Giluba patay sa gituohang kaaway

CEBU, Philippines - Namatay ang usa ka tawo human kini dunggaba sa gituohang nagdumot kaniya sulod sa   usa ka tindahan sa Zone Sikwa, sa barangay Paknaan, dakbayan sa Mandaue sa miaging gabii.

Ang biktima mao si Claudy Araneta, 36, ulitawo, nga taga Zone Paliya, sa maong barangay, samtang ang suspetsado mao si Dante Sayson, hingkod nga taga barangay Mambaling, dakbayan sa Sugbo.

Si PO2 Heraclio Gamboa sa kapolisan sa Presinto 3 sa Mandaue City Police Office (MCPO) nga nagbase sa barangay Basak sa maong dakbayan miingon nga kuyog sa biktima ang mga higala nga nag-inom sa usa ka tindahan sa maong dapit.

Unya miabot   ang suspetsado uban usab sa mga barkada niini ug didto molingkod sa pikas nga lamesa.

Apan sa paglabay sa pipila ka takna dihang nangalasbag na sa bino nga ilang giinom, mibarog ang suspetsado ug miduol kini sa biktima ug mitunol og usa ka botelyang beer ngadto sa naulahi.

Tungod kay may ilimnon pa man sila, mibalibad ang biktima nga maoy gikasuk-an sa suspetsado.

Unya kalit kining milanit og   kutsilyo dayon gihansak ngadto sa dughan sa biktima sa makadaghang higayon.

 Ang biktima nga wala gayud makabantay ug wala ka panagang gumikan sa kakalit, nalup-og sa yuta ug dali kaayong nakalayas ang suspetsado pahilayo sa maong  lugar.

Gihatud dayon ang biktima sa iyang mga kauban   ngadto    sa Cortes General Hospital sa barangay Ibabao sa maong dakbayan diin kini ideklarar sa mga doktor nga dead on arrival.

May katahap ang kapolisan nga daan nang magkaaway ang biktima ug suspetsado ug   padayon pang gipangita sa kapolisan ang naulahi sa pagkakaron. (WC) (BANATNEWS)