Kakabus di babag sa kalamposan-Villar

CEBU, Philippines - Gidasig ni Senador Manuel Villar ang mga tinun-ang mitambong kagahapon sa buntag sa 1st Leaderhip Lecture Series 2nd Session sa Gullas Institute of Leadership nga gipahigayon diha sa Cebu Country Club barangay Banilad, dakbayan sa Sugbo.

“You can be a leader even it you are poor…. Poverty is not a hindrance to be a leader…Do not assume that if you are poor you can’t be a leader,” ni Villar pa. Si Villar kinsa maoy kamaguwangan sa siyam ka mga managsuon nagdaku sa Tondo, Manila mipaambit sa iyang kasinatian nga bata pa siya mitabang na siya sa ilang inahan sa pagpaninda og mga kinhason ug hipon sa merkado ngadto sa Divisoria aron mapaeskuyla ang walo niya ka mga igsuon.

Matud niya nga sa iyang kaagi wala siya mawagtangi sa paglaom nga mahimong magmalamposon hangtud nga nahimo siyang lider dili lang sa patigayon lakip na sa nasud.

“Sipag at tiyaga,” maoy yawe sa kalamposan niya sa iyang damgo.

Gibutyag ni Villar nga daghang higayon na usab siyang milukapa apan wala siya motagam ug mibarog aron kawhaton ang iyang damgo sa kinabuhi.

“I can see that our young people the poor one, most of our young people who are poor, most of them did not believe that they can be leaders,” matud ni Villar.

Gidasig sa Senador ang kabataan nga kinahanglang di na magpaabot pang mahuman sa ilang pagtuon una pa mangita’g trabaho o mamahimong negosyante o ba kaha usa ka lider basta determinado kini sa iyang direksyon.

Gilakbitan usab ni Villar ang kinaiya sa kadaghanan nga emosyon o ba kaha popularidad maoy magdiktar panahon sa pagpili og lider ug dili ang background kung angayan ba kini sa posisyon.

Si Gerald Anthony “Samsam” Gullas, assistant Vice President Finance and Administration sa University of the Visayas maoy mihatag sa Statement of Purpose, samtang ang apohan niining si Kongresista Eduardo Gullas maoy mipaila sa guest speaker.

Mitambong usab kagahapon ang kapikas sa Kongresista nga si Norma “Ming-Ming” Gullas, anak nilang si Gerald Anthony Gullas Sr., Dr. Jaquiline Gullas-Weckman, Vice President Academic sa UV ug Jiji Gullas. (BANATNEWS)