CEBU, Philippines - Gikaguol ni Lapulapu City Mayor Paz Radaza ang gikatakdang pagsira sa direct flight sa Quatar Airlines ngadto sa Doja, Quatar sa umaabot Marso 26 ning tuiga.
Matud pa ni Radaza nga dako kini og epekto sa turismo sa dakbayan sa Lapulapu ug sa probinsiya sa Sugbu hinungdan nga iyang gihangyo ang konseho sa dakbayan sa Lapulapu nga mohimo og resolusyon nga mohangyo sa tagdumala sa maong airline company nga dili ihinayon ang maong lakang.
Gani si Bise Gobernador Agnes Magpale mihimo na usab og lakang sa paghangyo sa Qatar Airlines kay dako kini og epekto sa ekonomiya sa Sugbu.
Nagmahay usab si Mayor Radaza ngadto ni Mactan-Cebu International Airport Administration General Manager Nigel Paul Villarete kay wala kini mopahibalo ngadto kanila sa maong plano sa Qatar Airlines. Apan si Villarete sa iyang bahin lakip sa nakugang sa maong sitwasyon gumikan kay gipakalitan usab sila sa management sa Qatar Airlines sa ilang plano. Hinuon gikalipay ni Radaza ang pag-operate sa bag-ong airline company sa Sugbu nga Eagle Trans Asia Airways o ETA Air nga nagserbisyo sa mga lokal ug langyaw’ng turista sa mga tourist spots sa nasud ilabi na sa Kabisayaan ug Mindanao.
Napanglantawang dugang trabaho alang sa mga Subuanon ang mahatag sa maong kompaniya ug molambo ang lokal nga turismo.
Sa pakighinabi sa tag-iya ug tagdumala sa ETA Air nga si Nino Luis Jamili kini mipadayag nga sila mobutang og mga flight schedules sa mga dapit nga wala maserbisyohi sa ubang mga airline company.
Karong Marso 5 pormal nang magsugod ang ilang operasyon sa ilang biyahe sa Calbayog ug Catarman, Leyte; Tacloban ug Tagbilaran cities ug mosunod ang planong pagbutang og flights sa uban pang mga dapit sa Visayas ug Mindanao.
Kasamtangang duha ka abyon nga 29-seater ug 16-seater ang gi-operate sa maong lokal nga airline. (BANATNEWS)