CEBU, Philippines - Gipaubos kagahapon sa buntag sa Bureau of Fire and Protection (BFP) sa dakbayan sa Talisay sa earthquake and fire evacuation drill ang mga tinun-an sa Talisay City College ug ang mga kawani sa Department of Education Talisay City Division.
Si SFO4 Rudyard Abellanosa, hepe sa pre-planning and communication relation sa pakighinabi sa mga tigbalita kagahapon nagkanayon nga gidungan ang tanang mga tunghaan nga pampubliko ug pribado lakip na ang mga establisamento sa pagpaubos sa maong drill aron sa pagpangandam sa mahitabong emerhensiya.
Mikabat ngadto sa unom ka minutos ug 49-segundos ang pagpahigayon sa evacuation o pagbiya sa mga partisipante sa TCC building nga ilang giukopahan ug nagtapok sa hawanan atubangan sa simbahan sa Saint Teresa de Avila. Gihulagway ni Abellanosa nga maayo ang gipakitang performance sa mga estudyante ug kawani sa DepEd sa maong drill gawas sa mga ginagmay’ng sayop nga dali rang makurihian.
Ang BFP magpahigayon sa tibuok tuig og mga lecture ug drill kabahin sa mga buhaton kung dunay emerhensiya ug duna usab silay mga pulong-pulong diha sa kabarangayan.
Sa laing bahin, si Dr. Edgar Martinez, Dean of Instruction and Discipline sa TCC mibutyag sa mga tigbalita kagahapon nga ikampaniya nila nga ang maong sistema sa pagpangandam sa emerhensiya seryosohon sa mga estudyante.
Gibutyag ni Martinez nga ang tanang estudyante sa TCC babaye ug lalaki miagi kini og training sa Reserve Officer Training Course (ROTC) nga ilang giandam aron makatabang panahon nga dunay kalamidad. (EIM) (BANATNEWS)