7-anyos 'gilumsan' sa laing mga bata

CEBU, Philippines - Patay ang usa ka 7- anyos nga batang lalaki nga gituohang nalumos o gilumsan sa grupo sa mga bata atol nga naligo sa daplin sa kadagatan sa Sacs 1 sa barangay Buaya, dakbayan sa Lapulapu alas- 5 pasado ang takna sa hapon niadtong miaging adlaw.

Ang biktima mao si Joshua kuyog sa laing bata nga 7- anyos nga si Rodulf nga ang mga bansagon gipugngan sa kapolisan sa Women’s Section sa Lapulapu City Police Office kay pulos minor de edad. Si PO2 Franklin Bolaquia sa Homicide Section sa kapolisan sa maong dakbayan miingon nga sa ilang pakisusi unang nangaligo ang duha sa maong baybayon ug naabtan sa laing upat ka mga batang lalaki nga ang panuigon 7- anyos ngadto sa 15-anyos ug pulos nagpuyo sa silingang sitio sa barangay Buaya.

Dugang pa niya nga daw gisuyaan sa upat ka mga bata ang duha nga misangko sa pagpanglabay og mga bukong ug uban pang mga gahing butang.

Matud pa ni Bolaquia tungod sa kahadlok ni Rodulf midagan kini ug nabiyaan si Joshua, apan mipadayon kini pagdagan ug nangayo og tabang sa mga molupyo.

Apan sa pag-abot sa mga residente nakit-an nila si Joshua nga wala nay panimuot nga mitidlom sa dagat hinungdan nga dali nila kining gihaw-as ug gisuwayan sa pagluwas ug gidala sa Mactan Doctor’s Hospital apan gideklarar kini sa mga doktor nga dead on arrival.

Sa gihimong followup operation duha sa upat ka mga batang nanakit sa managhigala ang ilang gikustodiya sa Womens’ Section alang sa paghimo og tukmang lakang.

Si SPO4 Edith Patalingjug nga nahinabi sa Banat News miingon nga ang duha nga naa sa ilang kostudiya ilaha nang gitugyan ngadto sa City Social Welfare. Gisusi pa sa kapolisan kung dunay kalambigitan ang maong mga bata ug sa duha pa nila ka kauban nga wala makuha sa kapolisan sa kamatayon sa maong bata. (EIM)  (BANATNEWS)