CEBU, Philippines - Usa ka wala mailhing lalaki nga gisulod og sako ang napalgang patay ug naputos og mga bun-og ang lawas daplin sa dalan diha sa sitio Nonoc, Barangay Tabunok, dakbayan sa Talisay kagahapon sayo sa buntag.
Usa ka tanod sa nahisgutang barangay nga si Roderick Abellana ang daling mi-report sa kapolisan sa maong hitabo human siya pahibaw-a sa pipila ka mga residente bahin sa patay’ng lawas.
Sila si PO1 Euwen Pitogo ug PO1 Robert Escovia ang daling miresponde sa maong report mibutyag sa Banat News nga gituohang gilabay lang sa lugar ang maong lalaki.
Ang biktima nagsul-ob og kombinasyon t-shirt nga may kolor nga itom ug puti ug itom nga short pants ug blonde ang buhok niini, gibana-banang dunay gitas-on sa pamarog nga 5’2, kasarangan ang gidak-on sa lawas ug gibanabanang 20 ngadto sa 22-anyos.
Matud ni Escovia nga kolor blue nga sako sa bugas ang gisudlan sa biktima diin ang sampot niini migimaw gikan sa baba sa sako.
Gawas niini ang sako giputos usab og floor mat ug dunay lingkuranan sa traysikad nga gituohan gilaki-laki sa lawas sa biktima ug gihigtan og higot sa manok ang mga tiil niini ug dunay samad sa ulo nga gituohang agi sa binunalan sa gahing butang.
Ang kapolisan nagpahigayon pa og imbestigasyon sa maong hitabo samtang ang patay’ng lawas gidala sa mga polis ngadto sa Saint Francis Funeral Homes aron ipaubos sa awtopsiya. (EIM) (BANATNEWS)