Hold departure order sa Swedish national gihikay

CEBU, Philippines - Gihikay na sa mga sakop sa Cebu Provincial Women’s Commission (CPWC) ang lakang nga paluwatan sa korte og hold departure order (HDO) ang usa ka Swedish national nga giingong miabuso sa usa ka menor de edad nga nahiabot dinhi sa Sugbo gikan sa Masbate sa miaging semana.

Kini ang gitug-an ni Vice Governor Agnes Magpale, nga nag-atiman sa CPWC ngadto sa mga sakop sa media.

Matud pa ni Magpale nga gikinahanglang    manubag gayud ang nahisgotang langyaw sa sala nga iyang nabuhat batok sa usa ka dalagita.

Alang kang Magpale nga dili sila buot nga makalingkawas ang nahisgutang Swedish national sa ilang gipasakang kaso batok niini. Dugang pa ni Magpale nga aron dili gayud makalikay ang nahisgotang akusado sa kaso nga giatubang niini ilang pangayoon sa korte nga luwatan kini og HDO ilabi na nga nakapiyansa ra ba kini og P300 mil alang sa temporaryo niyang kagawasan sa prisohan.

Mahinumdoman nga ang maong 67 anyos nga langyaw gipasakaan og kasong child abuse sa NBI human kini nila hidakpi uban sa giingong 9 anyos nga fiancée nga iyang gitaban sa pantalan dinhi sa dakbayan sa miaging semana.  - BANAT NEWS