Lawas mopuhag sa tanang krimen sa Lapulapu

CEBU, Philippines - Ang pagpuhag sa tanang matang sa illegal nga sugal sa dakbayan sa Lapulapu maoy unang tahas ni OIC Lapulapu City Police Office Director P/SSupt. Rey Lyndon Lawas, kinsa maoy bag-ong hepe sa kapolisan sa maong dakbayan.

Sa press conference kagahapon sa buntag si Mayor Paz Radaza mipadayag nga nagdepende sa maayong performance ni SSupt. Lawas ang pagrekomendar niya nga himoon kining permanenteng director sa kapolisan sa Lapulapu sa umaabot nga adlaw.

Samtang ang unang kamandoan ni Radaza ngadto ni SSupt. Lawas mao ang pagpuhag sa tanang illegal nga matang sa sugal nga mikatap sa dakbayan sa Lapulapu ilabi na ang video karera.

Sumala sa taho nga nadawat ni Radaza iyang nasayran nga midaghan ang mga video karera unit sa dakbayan sa Lapulapu human mamalhin ang ubang mga nagpadagan ning maong matang sa makina sa illegal nga sugal ngadto sa dakbayan kay gigukod sila sa mga lugar nga ilang gigikanan.

Gawas sa illegal nga sugal, ipasulbad usab sa mayor ang mga petty crime nga kasagarang mabiktima sama sa tulis, pagpanguot, pagpanglabni,   ug uban pa mao ang mga   langyaw nga  turista. Dako og pagsalig si Radaza sa katakos ni Lawas sa pagpatuman sa hingpit nga kalinaw ug kahusay sa dakbayan sa Lapulapu ilabi na sa maayong record niini sa pagdumala sa kapolisan isip Deputy Director sa Regional Intelligence Division sa PRO-7 nga kasamtangan usab niining gihuptan. Samtang sa bahin SSupt. Lawas, gipasalig niini   ngadto ni Radaza nga iyang tumanon ang mga kamandoan sa mayor gumikan kay mao usab kini ang gihatag nga tahas kaniya sa iyang Regional Director sa PRO 7. Apan alang kang Lawas nga mahimo niya kini pinaagi sa kooperasyon sa mga Oponganon ilabi na ang mga special unit sa mga kabarangayan. Matud pa ni SSupt. Lawas nga isip kaliwat usab sa mga Oponganon andam siya nga mohimo og mga kausaban sa pagdumala sa kapolisan ug sa operasyon niini aron matuman ang pagsumpo sa kriminalidad sa dakbayan. Miingon si Lawas nga iyang unahon ang pagbutang og mga opisyal nga angayang mohupot sa maong katungdanan sa matag departamento niini.

Iya usab nga itisok sa alimpatakan sa mga sakop sa kapolisan ang 3 M' kun Maramdaman, Makikita ug Makakausap nga mao kini ang matang sa mga polis nga madistino sa kadalanan nga dali rang duolon sa katawhan ug matagad ang mga panginahanglanon sa publiko ilabi na ang dali nga pagresponde niini sa bisan unsang alarma. Gumikan niini gihangyo ni SSupt. Lawas ang kooperasyon sa mga sakop sa Barangay Peacekeeping Action Team (BPAT) ug Unified Task Force (UTF) sa pagsumpo sa kriminalidad sa dakbayan.

Si SSupt. Lawas pormal nga miasumer sa iyang katungdanan sa milabay’ng semana human niya hulipi si P/SSupt. Anthony Obenza nga gidistino karon sa rehiyonal nga buhatan sa kapolisan.  - BANAT NEWS