Likod sa driver gitaopan sa pana

CEBU, Philippines - Giungotan sa Indian pana ang buko-buko sa usa ka drayber sa traysikad nga gipana sa mga estambay nga nangilkil sa mga drayber didto sa sitio Mahayahay, lungsod sa Cordova sa miaging gabii.

Ang biktima mao si Roberto Dinoy, hingkod, nga nagpuyo sa maong dapit, samtang ang mga suspetsado mao si Edmar Olitres, 19, ug Nito Wahing, 21, ug lain pang duha nila ka wala hiilhing kauban nga pulos nagpuyo sa maong dapit.

Si PO2 Mafred Maarat sa kapolisan sa maong lungsod miingon nga ang mga suspetsado nag-inom sa maong dapit ug dihang milabay ang traysikad nga gimaneho ni Roniel Potot, gisugat kini sa grupo ug gikilkilan   og kuwarta kay ilang idugang sa ipalit og ilimnon.

Apan nagdumili si Potot sa paghatag og kuwarta hinungdan nga mihiwasa sa kasuko ang mga suspetsado ug usa kanila migamit sa Indian pana ug gipana ang biktima

Apan malagmit gumikan sa kakurog sa kamot, imbis si Potot maoy maigo, didto na hinuon kini motaroy sa buko-buko ni Dinoy kinsa natayming nga nahiagi sa maong lugar dihang gitirohan sa pana si Potot.

Dihang nakita nila nga naigo si Dinoy dali kaayo silang nakasibat pahilayo sa maong dapit ug ang biktima nga nagping-it sa kasakit dali nga gidala sa Lapulapu City District Hospital apan gibalhin kini sa Vicente Sotto Memorial Medical Center sa dakbayan sa Sugbo. Si PO2 Maarat miingon nga sa follow up operation nga ilang gihimo ilang nadakpan ang duha ka mga suspetsado nga sila si Olitres ug Wahing ug kasamtangang gibalhog sa bilanggoan.

Padayon pa nilang gipangita ang laing duha ka kauban sa mga suspetsado.  - BANAT NEWS