Duha ka estudyante naghikog

CEBU, Philippines - Duha ka mga tinun-an usa niini graduating sa high school ug ang laing usa nagtungha sa kolehiyo ang naghikog sa managlahing lugar dinhi sa lalawigan sa Sugbo sa miaging Martes.

Ang unang nagpakamatay mao ang 24 anyos nga dalaga nga si Venus Garcia Lereda taga barangay Kodia lungsod sa Medredijos isla sa Bantayan nga nagtungha sa kolehiyo sa Salazar Institute of Technology (SIT). Si SPO1 Desebille Wainright sa Madredijos Police Station mibutyag sa Banat News nga si Lereda napalgan nalang kini sa iyang manghud nga si Jude nga nagbitay sulod sa ilang balay nga wala nay panimuot alas 3:10 sa hapon niadtong Martes. Dali unta niya kining gitabang pinaagi sa pagbadbad sa nylon nga pisi nga gihigot sa liog ug gani giingong nakatingog pa kini dihang natangtang ang pisi busa ila kining gihatud ngadto sa Bantayan District Hospital apan didto kini ideklarar nga dead on arrival.

Hangtud ning pagbalita wala pa makakuha og dugang kasayoran ang kapolisan bahin sa hinungdan sa maong paghikog.

Samtang gisundan kini og laing kaso sa hikog pagka alas 9:00 sa gabii didto sa Sitio Sto. Niño barangay Poblacion lungsod sa Sogod.

Ang nagpakamatay mao si Micheal Jordan, 18, ulitawo ug graduating sa high school karong buwana ug nagpuyo sa maong lugar. Si PO2 Jose Reden Hortelano, desk officer sa Sogod Police Station mibutyag usab sa Banat News nga si Jordan naguol kay gisultihan kini sa iyang principal nga dili    makagraduwar karong tuiga kun dili niini pangasaw-on ang iyang classmate nga iyang napamabdosan.

Gumikan niini gibati og tumang kaguol ang batan-on ug nianang pagka gabii nadiskobrehan nalang kini sa iyang uyoan nga si Temoteo Jordan nga nagbitay na sulod sa kuwarto niini nga migamit sa pisi nga higot sa manok igtatari sa iyang liog. Ila unta kining gitabang dayon apan nabugtoan    gyud sa kinabuhi, sumala sa kapolisan.   - BANAT NEWS