CEBU, Philippines - Mikabat sa dul-an usa ka tonilada nga mga pinabuthang isda ang nasakmit sa mga sakop sa Cebu City Bantay Dagat Task Force ug Bureau of Fisheries and Aquatic Resources (BFAR) sa kinalit nga inspeksyon niini nga didto sa Pasil Fish Market kagahapon sa kaadlawon.
Si Executive Director Ranulfo Sebusa sa Bantay Dagat mibutyag nga ang maong mga isda nga gisakpan sa mamsa, ketong ug solid mikabat sa 740 kilos ang tanan nga mokantidad usab og kapin P74 mil.
Matud pa ni Sebusa nga ilang nasakmit ang maong kargamento samtang ighahatod na unta kini ngadto sa usa ka fish dealer nga ginganlan og Marcelina “Nene” Surigao sa Pasil.
Si Surigao gitakda nga ipatawag sa buhatan sa Bantay Dagat karong adlawa aron tun-an ang tukmang kaso nga ipasaka batok niini.
Nasayran ni Sebusa nga ang maong mga isda naggikan sa Mindanao apan didto kini idunggo sa lungsod sa Santander ug didto usab kini isakay og trak paingon sa Pasil Fish Market sa dakbayan sa Sugbo.
Matud pa niya nga adunay ubang negosyante sa isda sa probinsya nga bisan asa lang nila ipadunggo ang ilang mga isda nga pinabuthan sa dili pa nila kini dad-on dinhi sa siyudad.
Giingong mao na kini ang buhaton sa ubang negosyante human nila hisayri nga higpit kaayo karon ang pagmonitor sa mga otoridad batok sa mga isdang nakuha sa illegal nga panagat.
Usa sa gibantayan karon sa Bantay Dagat mao ang mga pinabuthang isda nga paibabwan sa mga tarong nga isda inigtumod niini nganhi sa dakbayan.
Nagkanayon si Sebusa nga ilang idonar ang maong mga isda ngadto sa nagkadaiyang pampublikong tambalanan ug foundation nga nagbase sa siyudad sa Sugbo. - BANAT NEWS