Negosyante gitulis patay

CEBU, Philippines - Gipusil patay human tulisa ang usa ka negosyante nga nagdala og kapin P400 mil nga tseke ug cash sa mga tulisang de motor   didto sa barangay Don Andres Soriano DAS siyudad sa Toledo niadtong Martes sa alas 7:00 pasado sa gabii.

Ang biktima mao si Ma. Belen Santillan, 59, minyo, ug tag-iya sa Santillan Enterprises nga nagbaligya og mga construction materials nga nahimutang sa maong lugar.

Samtang ang mitulis mao ang duha ka wala hiilhing lalaki nga nagsakay og motorsiklo nga kolor itom nga walay plate number.

Si SPO4 Gil Lastimosa sa Toledo City    Police Station sa Banat News subay sa spot report nga gipadangat sa Lutopan Das Sub Station nga ang biktima molakaw na unta paingon sa ilang balay human manirado sa tindahan

Apan paggawas niini sa tindahan kalit lang miabot ang usa ka motorsiklo nga gisakyan sa duha ka tawo ug ang angkas niini sa luyo maoy nanaog dayong tion sa iyang armas de fuego ngadto sa biktima.

Si Edgar Macong, tag-iya sa tindahan nga silingan sa biktima sa interview sa TV5 miingon nga human labniha sa tulisan ang bag sa biktima misunod niini ang mga buto-buto sa armas.

Gani usa sa iyang mga customer mibunal pa og timbangan ug planggana ngadto sa tulisan ug maayo nalang kay wala kini apila og pusil.

Si Jun Montenegro usa usab sa mga nakasaksi sa maong tulis mitug-an usab sa TV5 nga gipusil sa tulisan ang biktima dihang nagmagahi kini sa paghatag sa bag nga iyang gibitbit.

Samtang si Steve Santillan, kagawad sa maong barangay ug anak sa biktima mibutyag usab sa TV5 nga ang sulod sa bag sa iyang inahan mao ang P394 mil nga balor sa upat ka tseke, diin duha niini mga pay to cash.

Midugang siya nga matag tseke nagkantidad og P118 mil ug P112 mil ug may cash pa.

Iya usab nga gisangpit sila si Gobernador Gwendolyn Garcia ug Kongresista Pablo John Garcia nga tabangan sila sa pagsulbad sa maong kaso.

Sumala sa kapolisan human mahagba sa yuta ang biktima misakay og balik sa motosiklo nga nagpaabot kaniya ang tulisan dala ang bag ug mipasirit kini paingon sa barangay Cantabacco.

Samtang ang biktima gisuwayan pa unta og hatud sa Carmen Copper Hospital apan gideklarar sa mga doktor didto nga dead on arrival (DOA).

Ang mirespondi nga mga polis nakapunit og duha ka kabhang sa bala sa kalibre .45 nga pistola sa crime scene nga gituohang gikan sa armas nga gigamit sa tulisan.

Subay sa nahipos nga inpormasyon sa kapulisan mikapin sa P400 mil nga tseke ug cash ang sulod sa bag dala na sa kapin P100 mil nga halin sa tindahan niadtong higayona.

Gituohan sa kapolisan nga mga lokal ra nga mga tulisan ang mibuhat sa maong krimen nga maoy ilang gipanid-an sa pagkakaron.  - BANAT NEWS