Lansis sa kamatuoran

CEBU, Philippines -  (Usa ka bana nga naungo sa pagdula og bilyar nabuntagan sa iyang kirida dali niyang gibuboan og pulbos ang iyang karsones pag-uli sa balay)

Bitoy: Day mosulti lang ko sa tinuod nabuntagan ko sa akong babaye.

Senyang: Babaye sa imong mata! Ayaw kog lipata nabuntagan na sad ka sa bilyaran nay nagkapulbos kag maayo ilaron pa ta (Toink!/Aguy!).

LUSOT! Hehehehehehehehehehehehehehehe!

Dili na daw uso ang pagpamakak karon. Kun gusto kang dili madudahan ang imong paglimod itug-an ang matuod. Apan sa dili pa nimo isugba ang imong kaugalingon sa kamatuoran siguroa nga dakong bakak tan-awon ang imong pag-angkon aron sigurong dili ka mapagod.

(Dihay laing bana nga nabuntagan sa iyang babaye gitunobtunob sa lapok ang iyang sapatos sa wala pa mopauli)

Senyang: (Suko) Diin ka gikan nga nabuntagan ka man?

Mengoy: Ah! Kuan Day…. Kanang…..

Senyang: Unsay kanang!!!!!

Mengoy:  Kuan …. Segi na lang tug-an na lang ko nabuntagan ko sa akong babaye.

Senyang: Bwisit! Unsay pagtuo nimo way buot ha! Klaro kay kang nabuntagan na sad og duwa anang golf nay nagkalapok nang imong sapatos kanahana ka. (Toink!/Ayay!)

LUSOT Again! Hehehehehehehehehehehehehe!

 Tinuod no! wala kaha ta mabiktima ining maong paagi sa kasamtangang panahon? Wala kaha ta magisa sa unsay atong nakita?

Ang akong punto mao nga ang atong mga mata mahimong gamiton sa mga buot molingla sa unsay matuod. Kun ingon kasayon ang paglingla sa usa ka tawo sa unsay iyang nakita nan dili lisod ang pagpatuo sa mga wala makita.

Kun naglibog mo sa akong ipasabot labaw pa ko (Toink!/Aguy!) Hehehehehehehehe!

(Dihay Pastor misulti sa iyang mga sakop nga magsangyaw siya kabahin sa pagpamakak sunod semana misangon nga basahon ang Markos 17 aron masabtan ang iyang wali)

Pastor: Inyo bang nabasa ang Markos 17?

Mga sakop: (Nagdungan) O Pastor…..

Pastor: Ang tinuod ang sinulat ni San Markos kutob lang sa 16 siguradong makasabot mo sa atong hisgutan karon ang pagpamakak (Toink!/Ayay!).

Hehehehehehehehehehehehehehe!

Dili ingon kasayon ang pag-ila sa unsay lansis taliwa sa pagsalig. Gikinahanglan karon ang tinud-anay nga pagtuon ug pagtimbangtimbang aron dili ka mapalipat sa kamatuoran.

Pananglitan sa nagpadayong impeachment trial batok kang Chief Justice Renato Corona.

Trabaho sa prosekusyon ang pagpresentar og kamatuoran sa mga pasangil batok sa labaw’ng pango sa hukmanan samtang katungod sa depensa ang pagpanalipod.

Karon pa lang mahimong duna na kay kaugalingong desisyon sa kaso. Ang dakong pangutana unsay imong gibasehan sa imong hukom? Proseso, hunahuna, kasingkasing o ang unsay imong nakita? Sa bisan unsang aspeto kinahanglan nga responsable ka sa unsay imong pagtuo ug kinahanglang maampingon nga dili mahug sa bung-aw sa lansis sa kamatuoran.

(emailad:[email protected])