Minantaw Marine Park buksan sa bisita

CEBU, Philippines - Gikatakdang buksan na unya ngadto sa mga bisita sama sa mga turista ang protektadong Minantaw Marine Park and Sanctuary (MMPS) diha sa barangay Caubian sa dakbayan sa Lapulapu.

Ang MMPS usa ka joint project nga gilusad pinasikad sa kooperasyon sa lokal nga kagamhanan, Chevron Philippines Inc., Project Seahorse Foundation ug United Fishers of Caubian (NAMACA) nga ang tuyo nga maprotektahan kining bahina sa Danajon Double Barrier Reef o Danajon Bank.

Ang Danajon Bank usa sa unom ka mga dagkong double barrier reefs sa kalibutan. Ang MMPS nga may 214.6 ektarya sakop lang sa Danajon Bank nga gipalibutan sa mga isla sa Cebu, Bohol, Leyte ug Southern Leyte.

Dinhing dapita nagsalig ang liboang mananagat kansang mga kuha anha dad-on sa kamerkaduhan sa maong mga dagkong isla apan tungod sa pag-abuso dakong bahin niini ang naguba tungod sa ilegal fishing.

Ang MMPS mao ra usab ang multi-use Marine Protected Area sa nasud diin adunay 55 ektaryang bahin niini nga gitugot nga tamnan og mga guso isip alternatibong pangabuhian sa mga mananagat; 62 ektarya sa regulated fishing zone ug 37 ektarya alang sa sustainable use zone ug 5 ektarya nga dili gyud papanagatan.

Matud pa ni Angelie Nellas, ang Senior Marine Biologist sa Project Seahorse Foundation dako ang natampo sa Chevron sa MMPS inabagan sa lokal nga kagamhanan sa Lapulapu ug sa komunidad sa Caubian Island.

Si Nellas dihang nahinabi sa Banat News miingon nga sukad nga giatiman sa MMPS upat ka tuig na ang nakalabay nakakita na sila og dakong kausaban tungod kay duna nay mga isdang namuyo ug dili na idlas dili susama kaniadto.

Giangkon hinuon niyang kinahanglan og lima ngadto sa napulo ka tuig una pa gyud makita ang dakong kausaban diin mokita na og dagko ang mananagat sa makuhang mga isda bunga sa pag-atiman.

Nanghinaot si Nellas nga ang Danajon Bank protehian sa tanang mga kalungsoran sa palibot niini sama sa gihimo karon sa dakbayan sa Lapulapu.

Ang katuyoan nga mabuksan sa mga bisita ug turista ang MMPS kini aron masayran sa publiko ang importansya niini kung palambuon ug protektahan tungod sa matabang niini sa komunidad ug sa abundang isda.   - (BANAT NEWS)