CEBU, Philippines - Ang mga polis nga sakop sa Criminal Investigation and Detection Group (CIDG)7 gipaubos sa duha ka adlaw nga basic gun handling marksmanship training sugod kagahapon ug matapos karong adlawa, sumala ni Sr. Supt. Jose Pante, hepe sa CIDG 7.
Si Pante sa interview sa mga tigbalita nagkanayon nga ang maong pagbansay nga gipahigayon didto sa Kamagong Shooting Range sulod sa Central Command iyang gihimo subay sa kamandoan sa Campo Crame nga ipabansay pag-ayo ang kapolisan sa paggamit sa ilang armas.
Kini tungod kay daghan pang mga polis sa tibuok nasud nga dili pa kaayo hanas nga mogamit sa ilang armas.
Matud ni Pante nga ang resulta unya niini iyang ipadala ngadto sa Campo Crame ug hatagan nila og grado kadtong iyang mga sakop ug kun mahagbong kini, iya kining bawian sa service firearm.
Hinuon giklaro ni Pante nga wala kini magpasabot nga dili na iuli ang armas nga iyang gibawi gikan sa usa ka polis, kundili ipaubos kini sa subsob nga pagbansay-bansay hangtud nga makapasar kini sa mga pagbansay.
Midugang siya nga tulo ka kuwarter matag tuig himuon niya ang training sa iyang mga sakop sanglit mao usab kini iyang gihimo bisan asa siya madestinong lugara.
Hinuon giklaro ni Pante nga tanang sakop sa CIDG dinhi sa Central Visayas ilabina sa dakbayan sa Sugbo hanas na kaayong mogamit sa ilang armas ug walay mga butalo kanila.
Lakip sa gipaubos sa pagbansay-bansay sa basic gun handling marksmanship training ang mga sakop usab sa DEFENSE PNP Press Corps nga gipangulohan sa presidente niini nga si Chito Aragon reporter sa DyLA ug Cebu Daily News (CDN) ug bise presidente nga si Arnold Bustamante reporter sa DyHP ug TV5.
Matud ni Pante nga iyang giapil sa ilang training ang mga sakop sa media aron mabansay usab kini sa paggamit sa armas de fuego. WC - (BANAT NEWS)