Gwen nangayo'g resulta sa imbestigasyon

CEBU, Philippines - Gitakdang sulod niining semanaha si Gobernadora Gwendolyn Garcia mangayo og resulta sa imbestigasyon sa nahitabong insidente niadtong Biyernes sulod sa Cebu Provincial Detention and Rehabilitation Center (CPDRC).

Matud sa gobernador nga unya na siya mopakanaog og desisyon kun ibalik o dugangan pa ba ang pagsuspenso sa mga pribilihiyo sa mga inmate sa nahisgutang bilanggoan.

“Depende gyud na nila. They brought this upon themselves. We’ll see”, matud ni Garcia atol sa gipahigayong press conference.

Si Garcia mimando kang Capitol consultant on jail matters Jose Maria Gastardo nga susihon ang nahitabong insidente ug mopahigayon og lawom nga imbestigasyon niini.

Ang maong imbestigasyon maglangkob sa pasangil sa mga inmate nga wala sila pakan-a sukad niadtong Biyernes ug gihigpitan sila sa mga nagdumala sa jail.

“After the incident, daghan dayong mga text purportedly gikan sa mga inmates. Nahibong lang ko giunsa pagka-text sa mga inmates nga wa man gyud sila’y cellphone, so I guess there will always be attempt to put a spin on the story and come up with a certain angle in order to benefit for whosoever”, ni Garcia pa. Matud sa gobernador nga iyang palisiya ang pagsuspenso sa mga prebilihiyo sa mga piniriso sa CPDRC kung mohimo kini og noise barrage.

Hinuon gihimakak ni Gastardo nga adunay nahitabong noise barrage o riot sa CPDRC niadtong Biyernes.

Kahinumdoman nga niadtong Biyernes nagkaguliyang ang mga binilanggo sa CPDRC dihang ang grupo sa dancing inmates miatake sa kauban nilang piniriso nga si Carillo Balueza, 26, kinsa giingong nagbugal-bugal atol sa gipahigayong practice sa sayaw sa mga dancing inmates.

Sa maong hitabo ang mga piniriso wala tugoting mogawas sa ilang mga silda ug gihatdan na lang sila og pagkaon. (WC) - (BANAT NEWS)