Labella modagan pagka-bise mayor sa Sugbu

CEBU, Philippines - Human sa subsob nga konsultasyon, pormal nang gipahibalo kagahapon ni Konsehal Edgardo Labella nga modagan siya pagka-bise mayor karong 2013 nga eleksyon.

Matud pa ni Labella nga gituman lang niya ang kagustuhan sa katawhan ilabi na nga wala’y hunong ang mga opisyales sa barangay ang magsige og adto sa iyang buhatan aron hangyuon nga magpapili sa nahisgutang posisyon.

Sumala pa niya nga ang tumong ra gyud niya mao ang pagserbisyo sa katawhan ug iyang giklaro nga magpabilin gihapon ang maayong pagtinagdanay sa makaatbang niya nga si Bise Mayor Joy Augustus Young.

Samtang si Young mirespetar sa hukom ni Labella ug dili na siya mohatag pa og komento gumikan kay suod sila nga managhigala.

Giangkon hinuon ni Young nga dili basta-basta alang kaniya nga iyang makaatbang sa sunod nga eleksyon ang iyang higala apan mao na kini ang realidad sa politika.

Matud pa ni Young nga hagbay ra siya nakadungog sa taho nga himuong runningmate ni Mayor Michael Rama si Labella hinungdan nga wala na siya makugang sa dihang gikumpirmar na ang maong balita kagahapon.

Samtang si Rama sa iyang bahin mipadayag nga lig-on nga pambato sa ilang grupo si Labella ilabi na nga siyam na kini ka tuig nga konsehal sa siyudad ug maayo usab ang performance niini sa konseho.

Gibutyag usab ni Rama kagahapon nga wala mahulga ang iyang grupo sa giingong balwarte sa mga del Mar ang amihanang distrito.

Matud pa sa mayor nga duna na sila’y mga gipanglista nga pangalan karon apan dili pa niya kini ibutyag apan giingong interesadong mamalik sa konseho ang mga kanhi konsehal sa siyudad nga sila si Edwin Jagmoc, Manuel Legaspi ug uban pa.

Gidungog usab nga posibleng malakip sa line-up ni Rama ang konsehal ug kanhi kapitan sa Barangay Lahug nga si Mary Ann delos Santos nga usa sa init nga kritiko ni Kongresista Tomas Osmeña.   EIM   - (BANAT NEWS)