Manag-amahan gi-ambush

CEBU, Philippines - Patay ang usa ka habal-habal drayber nga naghatud unta sa iyang anak babaye paingon nga motrabaho sa Mitsumi dihang gipusil sa nagsunod nga nagmotorsiklo diha sa sitio Taboc barangay Looc siyudad sa Danao kagahapon sa alas 5:55 sa buntag.

Ang biktima nga patay nang nadangat sa tambalanan mao si Boper Laurente, 55, nagpuyo sa sitio Lapulapu barangay Suba Danao City.

Samtang ang gitumbok nga suspek mao si Joselito Lucas, 33, nagpuyo sa sitio Lugwayan sa barangay Sta. Rosa sa samang dakbayan.

Matud ni PO1 Faron Avila, desk officer sa Danao City Police dihang nahinabi sa Banat News subay sa imbestigasyon ang biktima ug ang suspek nagkaaway ug nagka-initay sa wala pa matinong hinungdan nianang pagka gabii.

Kini maoy hinungdan nga sayo sa buntag kagahapon dihang gihatud sa biktima ang iyang anak nga si Genalyn Laurente wala makabantay ang biktima nga gisundan sila sa suspek ug pag-abot sa maong lugar gipusil sentro sa likod nga bahin sa ulo ang amahang Laurente. Natagak ang biktima sa motor nga iyang gisakyan ug nalamba ang motor ug naangol usab ang anak babaye sa biktima.

Daling gihatud sa Danao City District Hospital ang biktima apan gipalahos og transfer sa tambalanan dinhi sa dakbayan apan ang kabanay sa biktima mipahibawo sa kapolisan nga namatay gyud ang biktima.

Samtang ang suspek nadakpan sa kapulisan sa hot pursuit operation ug gihikay na ang kasong ipasaka. (EIM) - (BANAT NEWS)