Religious rally sa Fuente Osmeña

CEBU, Philippines - Gipaabot nga maghuot ang trapiko sa Fuente Osmeña karong gabii tungod sa religious rally nga ipahigayon sa Iglesia ni Cristo (INC) sa maong lugar.

Sumala ni Brother Joel Calago, usa sa mga ministro sa INC dinhi sa Sugbo nga ang maong rally tambongan sa mga miyembro sa maong relihiyon gikan sa lalawigan sa Bohol, Negros Oriental, Siquijor ug taga dinhi sa lalawigan sa Sugbo.

Matud pa niya nga ang pagpahigayon og  religious rally sa INC maoy usa sa mga paagi niini sa pagpahibawo sa katawhan kalabot sa pagtulon-an sa INC.  Gani ang matag usa nga motambong sa maong rally gipaabot nga magdala usab og mga bisita nga dili pa sakop sa INC aron makadungog sa doktrina sa INC.

Matud pa ni Calago nga ang maong rally nga himoon dinhi sa dakbayan sa Sugbo kadungan usab   sa susamang rally nga ipahigayon didto sa Manila ug sa nagkalainlaing rehiyon sa Luzon, Mindanao ug Kabisay-an.

Una moabot kining adlawa ang mga tinugyanan sa City Traffic Operations and Management (CITOM) miandam na sa ilang mga enforcer sa pagpatuman sa hapsay nga dagan sa trapiko sa palibot sa Fuente Osmeña.

Kini tungod kay gituohang  maghuot ang maong lugar gumikan sa kaliboan ka tawo nga motambong sa maong kalihokan sa INC. (BANATNEWS)