Pretty Lola & handsome Lolo

CEBU, Philippines - Gipasiugdahan sa Cebu City Senior Citizens Social Development Project, ang mga senior citizens ning dakbayan, misaulog sa Post Valentine’s 2012 affair sa miaging Pebrero 16 sa Cebu City Public Library Sinulog Hall. Gitambongan sa mga tinugyanan sa pito ka distrito sa mga kahugpongan sa senior citizens, ang midaug sa pagka-Pretty Lola ug Handsome Lolo mao sila si G. ug Gng. Proceso ug Urbana Tejano sa Brgy. Apas, pinangulohan ni Chit Lugo.

Sa iyang pakigpulong, si Mayor Mike Rama, kinsa mihalad og duha ka awit ngadto sa Pretty Lola ug Handsome Lolo, mipahalipay sa mga senior citizens sa pagpasiugda sa valentine’s affair, nga usa sa makapalambo sa camaraderie ug fellowship tali sa mga senior citizens ning dakbayan.

Samtang sa iyang bahin, si Lando Llaguno, OSCA Head, Office of the Mayor, namahayag nga nag-una sa iyang mga priorities mao ang pagkab-ot sa tiunay nga panaghiusa sa mga senior citizens ning dakbayan.

Ang first runner up, sila si Norma Llaguno sa Adlaon ug Rey Mojica sa Busay, ug 2nd runner up, sila si Virginia Dolloso ug Virgilio Abregana, samtang ang mga judges, sila si Director Pat Gabuya sa City DILG; Josetees Fernandez, Secretary sa Assistant Provincial Manager sa NFA; ug Junel Echavez, event organizer.

Ang maong kalihokan, gitambayayongan pagpasiugda sa DSWS, Office of Senior Citizens Affairs ug sa city government.

Samtang sa laing bahin, alang niadtong gustong mosamot ka guwapa, gipahibawo ni Flora Bering, DSWS social welfare officer I ug focal person alang sa mga senior citizens, nga ang SM-Cebu nagtanyag og free beautification retouch alang sa kababayen-ang senior citizens. Kini sa Marso 9, Biyernes, gikan sa alas 10 sa buntag hangtud alas 5 sa hapon diha sa event center sa food court.

Mao ni ang atong giingon dinhi sa miagi natong mga lindog nga: stay young, look young.   Dili na ni imposible karong panahona, gumikan sa mga modernong kahimanan pagpatahom. Ato ning pahimuslan. Alang sa dugang kasayoran, tawag lang kang Flora sa DSWS, tel. 2617986, 2629350.

Ug ayaw kalimot, paminaw ug interact sa Senior Citizens Hour sa DYRC 648 kHz, matag Sabado, gikan sa alas 4 sa hapon hangtud alas 6 sa gabii, tels. 4125298, 4125249, 2388173.  (BANATNEWS)