CEBU, Philippines - Nagmaya si Cebu Arsobispo Jose Palma sa pagtudlo sa Sugboanong Obispo nga si Fr. John Du isip bag-ong Arsobispo sa Palo, Leyte nga maoy iyang gibakante niadtong Oktobre 2010.
“Nalipay ko sa iyang appointment. Syempre kay ang Obispo maoy shepherd of a community. Nagtuo ko nga anaa niya ang tanang nindot nga qualities aron mahimong maayo nga shepherd,” matud pa ni Palma.
Niadtong Sabado sa gabii gi-anunsiyo ni Pope Benedict XVI ang pagkatudlo sa 57-anyos nga si Du isip bag-ong pangulo sa archdiocese sa Palo, Leyte.
Si Palma kinsa mao usab ang presidente sa Catholics Bishop Conference of the Philippines (CBCP) nagkanayon nga nalipay siya nga si Du kinsa lumad nga taga-Bantayan ang gipili. Si Papal Nuncio to the Philippines Archbishop Guiseppe Pinto mao ang mipadangat sa maong taho ngadto ni Du pinaagi sa CBCP media director Msgr. Pedro Quitorio.
“In particular I am most happy of Du’s appointment because I know him for being a prayerful person and very dedicated to the Blessed Virgin Mary and very zealous in his ministry,” dugang pa ni Palma.
Si Du na-ordinahan pagka pari niadtong Hunyo 1, 1979 human makuha ang degrees sa philosophy ug theology didto sa San Carlos Seminary College sa Cebu ug Divine Word Seminary sa Tagaytay City. (BANATNEWS)