CEBU, Philippines - Gibutyag ni Mayor Michael Rama kagahapon nga duna pa’y dugang mga kaalyado sa Bando Osmeña Pundok Kauswagan (BOPK) ang motapon sa iyang line-up alang sa 2013 nga eleksyon.
Nagkanayon si Rama nga anam-anamon nila ang pag-anunsyo niini aron masurpresa ang ilang mga kaatbang.
Human gianunsyo ang alyansa nila sa kanhi Kongresista Antonio “Tony” Cuenco sa habagatang distrito sa Siyudad sa Sugbo gipahibalo ni Rama nga aduna na usab silay listahan alang sa kandidato sa pagka-kongresista sa amihanang distrito nga maoy iatbang nila kang Kongresista Cutie del Mar.
Apan matud pa sa mayor nga dili pa siya kabutyag niini sanglit nagpadayon pa ang mga negosasyon hangtod niining higayona.
Samtang sa line-up niya sa pagka-konsehal, misaysay si Rama nga ang uban niini mga kanhi konsehal ning dakbayan samtang ang uban mga incumbent nga kapitan sa barangay.
Misamot usab ang mga pagduda nga si Konsehal Edgardo Labella maoy running-mate ni Rama human misaysay ang mayor nga aduna siya’y gihangyo sa konsehal ug gipaabot na lang niya ang tubag niini. Gumikan sa kapakyas ni Labella sa pagkonpirmar sa iyang desisyon, nagpanon ang dul-an 30 ka mga konsehal ug kapitan sa nagkadaiyang barangay ning dakbayan ngadto sa buhatan ni Labella aron hangyoon kini nga mokandidato isip bise mayor ni Rama. Pipila kanila mao si kapitan Yodi Sanchez sa Busay ug Gerry Guardo sa Sambag I, apan si Labella nagkanayon nga tun-an pa niya kining tanan. Nasayran nga si Rama maoy nagsilbing campaign manager ni Cuenco niadtong 2007 nga piniliay. Samtang ang pangulo sa BOPK nga si Kongresista Tomas Osmeña misaysay nga wala siya mahulga sa panag-alyansa nila ni Cuenco ug Rama.
Gikuwestiyon usab ni Osmeña ang pangangkon ni Cuenco nga si Rama nag-presentar sa panaghiusa.
Matud pa sa kongresista nga dili niya matawag si Rama nga simbolo sa panaghiusa ug usa sa iyang gibasehan niini mao ang pagbiya sa mayor sa BOPK sa miaging tuig.
Samtang ang i-agaw sa mayor nga si Kapitan George Rama sa San Nicolas misaysay nga iyang giawhag si Kanhi Konsehal Junjun Davide nga mobalik pag-parehistro dinhi sa siyudad aron maoy moatbang kang del Mar.(WC) (BANATNEWS)