Araw ng mga buntis ipahigayon

CEBU, Philippines - Ang mga opisyal sa Philippine Obsterical and Gynecological Society (POGS) nakigtagbo kang Gobernador Gwen Garcia sa pagpahibawo nga ipahigayon dinhi sa lalawigan sa Sugbo ang "Araw ng mga Buntis" karong tuiga.

Ang grupo gipangulohan nila ni Dr. Virginia Abalos, ang Regional President ug ni Cebu Chapter President Dr. Maria Lourdes Chan uban sa ubang mga opisyal sa maong organisasyon.

Sumala pa ni Dr. Abalos nga gipangayo nila ang suporta sa gobernador alang sa kalampusan sa maong kalihukan.

Matud pa niya nga mahinangpon kaayong   gisanong sa gobernador ang ilang hangyo uban sa saad nga mosuporta kini sa maong kalihukan   ug gani hatagan kini og libre nga paggamit sa Cebu International Convention Center (CICC) sa siyudad sa Mandaue.

Gawas nga dili sila pabayron sa CICC, ang gobernador misaad usab nga tabangan kining makapapundok sa mga nagsabak nga mga inahan sa kalungsoran sa tibuok lalawigan sa Sugbo sa tinguha niining makalangkat og record sa Guinness Book of World Record nga makapatigom og labing daghang mga buntis nga magdungan sa pagpa-prenatal sulod sa usa ka lugar sa usa ka higayon.

Matud pa ni Dr. Abalos nga daghan silang mga doktor nga mohatag og libreng prenatal sa mga buntis. (BANATNEWS)