Polis may 5 ka saksi batok ni Echavez

CEBU, Philippines - Giangkon sa kapolisan sa Talisay nga aduna silay lima ka lig-ong mga saksi nga mitumbok kang Tommy Laburada Echavez, 39, nga maoy mipauwan og bala sa sakyanan nga giluwanan sa asawa ni Atty. Raul Sesbreño ug sa laing duha ka kauban niini nga pulos nangamatay sa maong pagpamanhig.

Mao kini ang gibutyag ni SPO1 Mikie Espina usa sa mga operatiba nga nakigpinusilay kang Echavez niadtong Domingo sa buntag dihang ila kining gisikop, mibutyag sa mga tigbalita kagahapon nga duna sila’y lima ka mga lig-ong witness kinsa mitumbok kang Echavez nga maoy mipauwan og bala ngadto sa sakyanan nga gisakyan nila ni Virginia Sesbreño, Joshua Young ug Soledad Epante.

Matud ni Espina nga ang maong mga saksi walay usa ka metro ang distansiya niini gikan sa suspetsado dihang gipamusil niini sila si Virginia Sesbreño, Joshua Young ug Soledad Epante ug gani miilis pa og magazine sa iyang pistola si Echavez sa maong higayon.

Duha ka adlaw gikan sa maong hitabo ang maong mga saksi miadto sa Talisay City Police Station ug gitudlo nila ang hulagway ni Echavez nga nahimutang sa most wanted gallery nga maoy namusil.

Ang maong mga saksi miluwat na og affidavit ug giingong mibutyag usab kini nga ang kalibre .45 nga pistola nga gigamit ni Echavez sa pakigpinusilay sa mga polis mao usab ang pistola nga gigamit niini sa pagpamanhig sa mga biktima

Ang kapolisan nagdumili pa gihapon sa pagbutyag sa ngalan sa kauban ni Echavez ug sa utok sa maong pagpamanhig.

Kahinumdoman nga si Echavez natapsingan sa bala sa iyang lawas dihang gipusil kini ni Espina.

Ang suspetsado maoy unang mipusil kang Espina apan wala kini makaigo sulod sa duha ka higayon.

Human siya maigo ni Espina, giusban siya  pagpusil   ni PO3 Ferdinand Pablo nga maoy nakapisok sa walang bahin sa iyang nawong ug ang bala milahos sa tuo niyang tampihak.

Matud ni Espina nga sa ulahing kasayoran nila kagahapon bahin sa kahimtang ni Echavez padayon pa gihapon kining giatiman sa mga doktor ug giabunohan pa og dugo.

Gibutyag ni Espina nga si Echavez giingong usa ka gun for hire ug nalambigit kini sa nagkalainlaing insidente sa pagpamusil samtang   aduna usab kini pending nga warrant of arrest.

Matud pa ni Espina nga susihon nila ang tanang branches sa Regional Trial Court (RTC) pagsuta sa mga kaso sa suspetsado.

Gawas niini ang suspetsado migamit og laing ngalan nga mao ang “Tomas Cariño”. Si Espina nagkanayon nga gikatakda nilang dad-on ngadto sa tambalanan nga nahimutangan ni Echavez ang mga saksi aron makita gyud nila personal ang suspetsado ug ilhon siya pag-usab pagsiguro nga si Echavez maoy gunman sa pagpamanhig. (BANATNEWS)