300 punoang marijuana gilarot sa mga polis

CEBU, Philippines - Mikaping 300 ka punoan sa marijuana nga anihunon na ang gipanglarot sa kapolisan sa duha ka managlahing plantasyon didto sa bukirang bahin sa Sitio Lubo, barangay Captain Claudio, siyudad sa Toledo niadtong Biyernes sa alas 7:00 sa buntag. Si SPO4 Gil Lastimosa, desk officer sa Toledo City Police Station mibutyag nga ang pagpanglarot nahimo human nila madawat ang impormasyon bahin sa giingong   plantasyon sa maong mga tanom didto sa maong lugar.

Ang hepe sa Toledo City Police Station nga si Supt. Julian Entoma ug mga sakop niini maoy  misusi dayon sa maong lugar   ug human nila masuta nga tinuod ang maong taho, gipangibot dayon nila ang mga hamtong ug anihonon na nga mga punoan sa marijuana.

Apan una sila moabot sa maong dapit, may nakita silang duha ka mag-uuma nga nag-atiman sa maong mga tanom.

Apan nakabantay ang maong mga mag-uuma   ug dali kaayo kining nakasibat pinaagi sa pagkaratel og dagan busa wala hidakpi sa kapolisan.

Human nila malarot ang kaping 300 ka punoan sa marijuana nangutana sila sa mga mag-uuma sa maong dapit ug nasayran nila nga ang maong mga plantasyon giingong gipanag-iya nila ni Ronnie Bacon, ug Toto Baran, pulos hingkod ug mga mag-uuma sa maong lugar. Sa uma ni Bacon mikabat sa 172 ka punoang marijuana ang naibot sa kapolisan, samtang 137 usab ka punoan ang sa kang Baran.

Gihakot kini sa kapolisan ug   kasamtangang gikustodiya nila karon sa ilang buhatan samtang gihikay na ang kaso nga isang-at batok duha ka mag-uuma nga maoy tag-iya sa maong mga tanom.  - BANAT NEWS