3 gipamusil angol sa kontra

CEBU, Philippines - Tulo ka sakop sa Bloods Gang gipamusil angol   sa kontra nilang sakop sa Crips Gang didto sa national Highway sa Cogon East, lungsod sa Carmen sa miaging gabii.

Ang mga biktima nga mga sakop sa Bloods Gang mao sila si Amado Rosauro, 20, kinsa nasabak sa agtang, ug Philbert Yangan, 14, kansang tiil gilapsan sa bala, ug Mary Joy Hagnaya, 16 , nasabak sa bat-ang ug milapos ang bala sa iyang tiyan.

Samtang ang mga suspetsado nailhan usab nga sila si Raymart Awing, ug Juvil Punis, kinsa pulos molupyo sa maong lugar ug giingong sakop sa Crips Gang.

Sa pakighinabi sa Banat News ni PO1 Everet Capuyan sa Carmen Police kini misaysay nga ang mga biktima gikang nanglaag   sa plaza sa maong barangay.

Dihang namauli na sila   gisundan kini sa mga suspetsado   ug sa walay igong hinungdan kalit lang   silang gipamusil pinaagi sa wala matinong kalibre nga armas de fuego. Nanagan ang mga biktima apan wala sila makalingkawas sa mga bala sa armas sa mga suspetsado nga miigo kanila. Dali kaayong nakasibat ang mga suspetsado human masuta nga pulos na samaron ang mga biktima.

Ang mga biktima gihatud dayon sa mga tagtungod ngadto sa Carmen District Hospital apan gibalhin kini ngadto sa tambalanan sa dakbayan sa Sugbo. Matud pa ni Capuyan nga wala pa sila makadawat og dugang kasayoran sa kahimtang sa mga biktima sa pagsulat ning balita.

Samtang gilusad usab sa kapolisan ang hot pursuit operation batok sa mga suspetsado nga kasamtangang nanglayas ug wala na motungha sa ilang balay.  - BANAT NEWS