CEBU, Philippines - Mimenus ang krimen sa pagsulod niining tuiga sa probinsya sa Bohol apan taas gihapon ang mga insidente sa pagpangawat sumala pa sa direktor sa Bohol Provincial Police Office nga si Sr. Supt. Constantino Barot sa gipahigayong Provincial Peace and Order Council.
Matud pa sa kapolisan ‘generally peaceful’ ug mimenus og 11 porsiyento ang crime volume apan pabiling taas ang mga insidente sa kawat sa bulan sa Enero 2012.
“There was significant decrease in the crime volume in January 2012 as compared to the same (period) of last year,” matud pang Barot.
Si Barot mipahibalo niini atol sa binuwang BPPOC atubangan sa gobernador niadtong Pebrero 21, 2012.
Matud pa nga nakatala ang kapolisan og 105 ka kasong theft nga 51% sa sumada 246 (index ug non-index cases) sa maong period, nga mas ubos kumparar sa milabay’ng tuig nga 278.
Sa power point presentation ni Barot nagpakitang 52 ka insidente sa tulis ( 25%), physical injuries 28 ka kaso o 14%. Samtang 6 ka kaso ang homicide; murder, 6; pito ka karnap, ug usa ka rape.
Wala hinuon nabutang sa report kung asa nga lungsod gikan ang maong mga natala ug ang crime-solving efficiency rate sa kapolisan sa samang period.
Aron mamentinar ang kalinaw miinsister si Gov. Edgar Chatto nga buhion ang Bohol Local Peace Forum nga pangulohan gihapon ni Msgr. Leonardo Medroso, D. D., ang obispo sa Tagbilaran diocese inabagan ni Msgr. Vincent Noel, D. D., ang obispo sa Talibon diocese. (BANATNEWS)