CEBU, Philippines - Ang kanhi brodkaster nga si Rene Alquizola, naglaraw nga magpapili pag-usab isip konsehal sa ilang lungsod sa Barili karong umaabot nga election sa sunod tuig.
Si Alquizola kinsa kanhi station manager sa estasyon DYMR mibutyag nga nadasig siya sa gipakitang kainit sa suporta sa kabarangayan sa Barili nga iya nang nalibot ug nakonsulta.
Isip lumad nga Barilinhon ilado kaayo si Alquizola sanglit nagtubo kini sa banay’ng nahimong haligi sa pangatungdanan sa maong lungsod gikan sa iyang amahan kaniadto.
Matud pa ni Alquizola nga sa milabay’ng piyesta sa barangay Malolos, Barili iyang nasinati ang mainitong pagdawat ug pag-abi-abi sa mga molupyo kaniya
Nakuha usab ni Alquizola ang 100% pagpaluyo ni Kapitan Aquiles Gatcho sa maong barangay kinsa miingon nga si Alquizola angay nga hatagan og katungdanan sa ilang lungsod tungod sa iyang integridad, katakos ug baruganan.
Lahi si Alquizola sa uban nga walay pagtagad ug walay pagbati sa lungsod sa Barili, matud ni Gatcho.
Si Rene Alquizola, usa ka opisyal kaniadto sa Kapisanan ng mga Brodkaster ng Pilipinas (KBP), natudlo sa Board of Trustees sa Cebu State College of Science & Technology nga karon nailhan na nga Cebu Technological University, ug founding official sa Barilinhong Nagkahiusa Alang sa Kalambuan. Siya maguwang ni kanhi Mayor Bobby Alquizola ug anak ni kanhi vice mayor Pete Alquizola. (BANATNEWS)