4 sa 13 konsehal sa Talisay way palta

CEBU, Philippines - Upat sa 13 ka mga konsehal sa dakbayan sa Talisay maoy may perfect attendance sa ilang mga sesyon sa milabay’ng tuig.

Kini base sa record sa Sangguniang Panglungsod (SP) Secretary sukad niadtong Hulyo 13, 2010 hangtud sa buwan sa Disyembre 2011.

Si Konsehal Danny Caballero ug Romeo Villarante kinsa pulos sakop sa kampo sa oposisyon ug ang duha ka mga konsehal sa administrasyon nga sila si Rodi Cabigas ug Dennis Basillote pulos walay palta sa pagtambong sa ilang sesyon ug wala usab silay leave of absence.

Ang first termer nga konsehal nga si Eduardo Gullas III maoy may labing daghan og palta nga mikabat og 17 ka higayon . Kasagaran sa maong palta ni Gullas, sick leave ug may duha ka adlaw nga special leave.

Misunod kaniya mao ang presidente sa Sangguniang Kabataan Federation nga si Carmel John Burlas kinsa adunay 13 ka mga palta sa pagtambong sa sesyon sa konseho.

Sa mga palta ni Burlas, lima niini, sick leave, duha ang official business, tulo ka special leave ug usa ka official leave apan wala siya’y gihatag nga rason sa duha niya ka mga palta. Si Konsehal Bernard Odilao nakapalta usab og walo ka higayon , diin upat niini special leave, duha ang sick leave, usa ang official business apan wala siya mohatag og rason sa usa niya ka leave.

Si Bise Mayor Alan Bucao, Konsehal Choy Aznar ug ang presidente sa Association of Barangay Council nga si Charles Basillote adunay tulo ka mga palta, matag usa kanila.

Niadtong Oktubre, 23, Nobembre 8, ug Nobiyembre 15 sa milabay’ng tuig si Bucao nag-vacation leave.

Samtang si Basillote tulo ka adlaw nga nag-sick leave ug si Aznar usa ka adlaw ang official business ug duha ka adlaw ang sick leave .

Si Konsehal Val Ylanan sa oposisyon ug si Edward Alesna sa administrasyon matag usa kanila may tag- duha ka palta.

Usa sa palta ni Ylanan, sick leave, ug ang usa special leave samtang si Alesna , may sick leave ug walay rason ang lain niyang palta.

Si Konsehal Celiapo Cabuenas mipalta og usa ka higayon isip special leave. (BANATNEWS)