Sidewalk sa Mandaue di na patindahan

CEBU, Philippines - Higpit na nga gidid-an sa kagamhanan sa dakbayan sa Mandaue ang mga vendor sa pagpamaligya sa daplin sa kadalanan ubos sa gipasiugdahang “My Mandaue Program.”

Si Editha Cortes sa Taga Mandaue Incorporated kinsa maoy nangulo sa maong programa miingon sa mga tigbalita nga tulo ka lakang ang ilang gipasiugdahan   alang sa kalamposan ning maong programa

Ang unang lakang nga ilang gihimo mao ang pagpahibawo sa mga manindahay nga dili na patindahan og bisan unsang baligya ang daplin sa kadalanan.

Ang sidewalk sa mga barangay Mantuyong, Centro, Ibabao, ug Guizo, maoy gihimo nilang pilot area niini.

Ang ikaduha nilang lakang mao ang pagpahimutang sa mga vendor ngadto sa bag-ong merkado sa sitio Tribunal sa barangay Centro.

Mangita usab sila og pribadong luna nga kaabangan diin maoy tindahanan sa mga nitibong pagkaon sama sa bibingka, budbod, tagaktak, masareal ug uban pa.

Dugang pa ni Cortes nga sa kasamtangan anaa na sila sa ikatulong lakang nga mao pagpanglimpiyo ug pagpamintal sa kadalanan sa maong dakbayan.

Gitataw ni Cortes nga patahomon nila ang palibot sa dakbayan aron labi kining   makadani sa mga langyaw nga mobisita   sa maong lugar. (BANATNEWS)