Nacario trade center giwarningan

CEBU, Philippines - Si Talisay City Administrator Richel Bacaltos mipasidaan sa tagdumala sa Nacario Trade Center (NTC) nga gawas lamang kun motuman kini sa mando sa korte, maluwas sa kompromiso ang ilang application sa occupancy permit sa city hall.

Si Bacaltos nagkanayon nga naghangyo sila sa tagdumala sa NTC nga motuman sa desisyon sa korte nga nagdili sa mga vendor nga nag-abang sa ilang mga lamesa sa pagbaligya og karne, bugas, utanon, itlog, isda, buwad ug uban pang mga poultry product.

Ang maong pasidaan gihimo ni Bacaltos human sila makadawat og report nga ang NTC wala magtagad ug hinuon nagmagahi kini sa pagtuman sa mando sa korte ug kung mapamatud-an kini, ang city hall kuli nang moluwat og occupancy permit ngadto sa NTC.

Sayo niini si Regional Trial Court (RTC) Judge Estela Alma Singco sa Branch 7, miluwat og mando niadtong Pebrero 15, 2012 nga ang NTC dili na patindahan sa mga gipanghinganlang produkto sa itaas.

Busa miluwat usab dayon og memorandum ang tagdumala sa NTC ngadto sa tanang mga stall holder niini sa pagtuman sa maong mando apan giingon nga hangtod karon nagmagahi kuno ang uban sa pagtuman niini kansang tulubagon ngadto sa korte iya sa tagdumala sa NTC.

Hinuon matud pa ni Bacaltos nga gumikan sa maong report , mopahigayon og pakisusi ang city hall   sa NTC aron masuta ang kamatuoran niini.

Ang occupancy permit usa sa mga panginahanglan sa pagkuha og business permit.

Si Bacaltos midugang nga bisan pa kung ang city hall makaisyu na og business permit ngadto sa NTC i-revoke nila kini kung aduna silay makitang kalapasan.(/WC) (BANATNEWS)