Namatay sa 27 ka samad dinunggaban

CEBU, Philippines - Patay nang napalgan ang usa ka 49-anyos nga lalaki nga gitusak og kutsilyo 27 ka higayon kagahapon sayo sa buntag diha sa daplin sa karsada sa barangay Ablayan, lungsod sa Dalaguete.

Ang biktima giila sa mga polis nga si Veteliano Amad Vejante , usa ka mag-uuma ug nagpuyo sa maong dapit.

Si PO3 Noeh Rosales kinsa usa sa miresponde sa maong hitabo mitug-an sa Banat News nga base sa ilang nakuhang impormasyon gikan nakig-inom sa higalang ginganlan og “Ador” ang biktima niadtong Biyernes.

Apan alas 11:00 sa gabii gibiyaan ni Ador si Vejante kay mopauli na kini apan gipadayon sa naulahi ang pag-inom.

Si Rosales nagkanayon nga usa sa ilang gituohan nga gipareglahan ang biktima tungod kay giingong hilomon kini, dili maoy kung mahubog ug walay nakaaway diha sa ilang dapit.

Hinuon si Rosales midugang nga gipaladman nila ang imbestigasyon sa maong hitabo aron mailhan ang kriminal ug mahibaw-an ang motibo niini. (BANATNEWS)