6 langyaw gikawatan sa mga babaye

CEBU, Philippines - Gihakot sa mga babayeng mugbo og lupad ang kwarta sa unom ka mga Swedish national sa usa ka hotel nga ilang gipuy-an sa Brgy. Pusok dakbayan sa Lapulapu sa milabay’ng adlaw.

Igo nalang nagpa-blotter sa kapolisan ang mga biktimang sila si Carl Emanuel Linquish, 24, kinsa nakuhaan og P20 mil; Simon Sanbibong, 24, nakuhaa’g P15 mil; Jimmil Ugmad, 27, nakuhaa’g P20 mil; Martin Vincent, 25, nakuhaa’g P20 mil ug i-phone; Ruben Tiesenros, 25, nakuhaa’g P20 mil; ug Dylan Macfaclin nga nakuhaan usab og P20 mil.

Matud pa sa mga biktima gikan sila sa usa ka resto bar sa dakbayan sa Sugbu ug ilang gidala sa ilang gipuy-ang hotel alang sa pagtagbaw sa lawasnong kahinam.

Apan pagkabuntag wala na ang maong mga babaye ingon man ang ilang mga kwarta, nagduda si Linquish nga adunay pangpakatulog nga gibutang sa ilang ilimnon.Ang kapolisan padayon pa pag-ila sa mga suspek. (BANATNEWS)