Bata nadagit sa multicab namatay

CEBU, Philippines - Patay ang 6 anyos nga batang lalaki dihang nadagit kini sa multicab nga gimaneho sa silingan niini sa dalan Gerardo Ouano sa barangay Opao sa dakbayan sa Mandaue sa miaging hapon.

Ang namatay mao si Junren Batoon, taga sitio Walingwaling sa nahisgotang barangay ug ang suspetsado nga nagmaneho sa maong sakyanan mao si Bernan Antero Bilbuena, 26, nga nagpuyo usab sa maong dapit.

Si PO1 Jeffrey Alpas sa traffic division sa Mandaue City Police Office (MCPO) dihang nahinabi sa Banat News miingon nga naglakaw sa daplin sa dalan ang biktima dihang nadagit kini sa multicab nga gimaneho sa suspetsado hinungdan sa pagkaangol niini.

Dali kining gihatod sa suspetsado ang biktima ngadto sa Cortes General Hospital sa dalan S.B. Cabahug sa barangay Ibabao sa maong dakbayan apan gideklarar kining patay sa mga doktor sa paglabay sa pipila ka oras .

Dugang pa ni PO1 Alpas nga ang suspetsado mitahan dayon sa iyang kaugalingon ngadto sa ilang buhatan ug kasamtangang gibalhog sa detention cell sa Presinto 5 sa barangay Opao samtang gihikay na nila ang kaso   nga reckless imprudence resulting to homicide batok niini.(/WC) (BANATNEWS)