Balay gisunog, mga silingang balay naamong

CEBU, Philippines - Gidakop ug gibalhog sa karsel ang usa ka 39-anyos nga lalaki nga gidudahang mituyo pagsunog sa ilang pinuy-anan nga nakaamong sa lima ka panimay sa mga silingan diha sa sitio Panagdait sa barangay Ibabao lungsod sa Cordova niadtong Biyernes sa alas 5:20 sa hapon.

Ang gidakop ug gitakdang pasakaan og kasong arson mao si Fernando Daluhig, 39.

Samtang naamong nga mga panimalay gipanag-iya nila ni Johny Henonie ug kapuyo nga si Julian Cola,32; Lucy Henonie; Raymundo Cua ug ang partially burned nga panimalay ni Vicente Roda.

Gibanabanang P332 mil ang kinatibuk-ang danyos sa maong sunog.

Usa ka saksi ang mitumbok kang Daluhig nga misulod sa balay niini ug pagkataudtaod misilaob ang balay ug migawas ang suspek nga nagbitbit og bag.

Dugang nahipos nga impormasyon ni SFO1 Samuel Tampus sa Cordova Fire Station dihang nahinabi sa Banat News nga si Daluhig ug kapuyo niining si Susan Supan wala nay maayong relasyon ug atua na magpuyo sa karenderya niini sa dakbayan sa Lapulapu ang babaye. (BANATNEWS)