Suspek sa drive-by shooting gikiha

CEBU, Philippines - Gipasaka na ngadto sa korte ang kasong kalapasan sa Republic Act 8294 kon paghupot og illegal nga armas batok sa giakusahang ‘drive-by shooter’ kini human siya nagdumili sa pagtubag sa akusasyon batok kaniya. Si Prosecutor Alex Gabud mipasaka ngadto na sa korte ang nahisgutang kaso batok kang Rhene Baclaan, 22, taga sitio Suran sa barangay Quiot ning dakbayan.

Matud pa ni Gabud nagdumili pagpaubos sa preliminary investigation si Baclaan nga maghatag unta kaniya og higayong matubag ang akusasyon batok kaniya.

“I do hereby certify let the information of the case be filed against the accused for not having executed a waiver pursuant to Article 125, of the Revised Penal Code,” pasabot pa ni Gabud.

Tungod niini, si Gabud mirekomendar og P80 mil nga piyansa isip bayad sa temporaryong kagawasan ni Baclaan. Base sa impormasyon, nasayran nga ang akusado gikatahong diha sa iyang posesyon ang kalibre .45 nga adunay usa ka magazine nga aduna usab sulod nga pito ka buhing bala ug pito ka kabhang sa maong kalibre nga walay lisensya paghupot niini.

Ang pagkasikop ni Baclaan bunga sa kampanya sa kapolisan aron mapakgang ang nagsunod nga drive-by shootings sa dakbayan niadtong Pebrero 18 diin ilang nasigpatan sa F. Jaca St. sa barangay Kinasang-an-Pardo ang suspek nga nagbarog duol sa usa ka motorsiklo daplin sa karsada.

Si Baclaan atol sa pakighinabi sa mga tigbalita kaniya una nang miangkon sa usa ka insidente sa drive-by shooting nga usa siya sa mga namusil. (BANATNEWS)