Relic ni Santa Clara gidugok sa mga Katoliko

CEBU, Philippines - Gihangop ug gidugok sa mga deboto ang pag-abot sa Sugbo sa balaang relic ni St.Clare of Assisi niadtong Miyerkules diha sa Cebu Metropolitan Cathedral.

Ang relic ni St.Clare miabot alas-3:00 hapon sa Mactan-Cebu International Airport ug gikan didto usa ka motorkada ang gipahigayon nga milibot sa mga dagkung syudad dinhi sa Sugbo.

Uban sa maong relic nga mibisita sa nasud mao si Philippine Ambassador to the Holy See Mercedes Tuason, Josie Bantog, Nada Sbutega, Carmenai Montanari ug Padre Jess Dajac mga delegado sa Missionaries of Faith.

Kini ang labing unang higayon nga gidala ang relic ni St.Clare dinhi sa Asya gikan sa Roma.

Pagka alas-6:00 sa gabii, usa ka Santos nga Misa ang gipangulohan ni Cebu Archbishop Jose Palma diin gisugat usab ang timaan sa pagbukas sa Lenten season nga mao ang ‘Ash Wednesday.’

Ang relic ni St.Clare gibalhin na sa Poor Claire Monastery sa Tayud, Consolacion diin kini magpabilin hangtud sa Sabado. Ang maong relic usa ka bukog gikan sa parte sa ulo ni St.Claire kinsa mao ang ‘Patroness of the Television.’

Gawas sa Sugbo, ang relic dad-on usab didto sa ubang dapit sa Luzon ug Mindanao sa dili pa kini ibalik ngadto sa Roma. Si St. Claire of Assisi namatay niadtong Agusto 11,1253.(/EIM) (BANATNEWS)