Midaob sa balay naghinulsol

CEBU, Philippines - Gipasakaan og kaso sa kapolisan ang katabang nga giingong misunog sa balay sa iyang agalon nga miresulta sa pagkapaig sa iyang kaubang katabang niadtong Miyerkules sa kaadlawon diha sa Holy Family Village 1 sa barangay Banilad ning dakbayan.

Kasong arson with homicide ug qualified theft ang atubangon unya ni Aubrey Soria, 22, nga taga barangay Dumlog sa dakbayan sa Talisay kinsa niadto pang Lunes gidawat isip katabang sa pamilyang Farcon.

Lakip sa pasakaan og kasong obstruction of justice sa kapulisan ang inahan sa suspek human mitago sa iyang anak didto sa lungsod sa Minglanilla ingon man ang mga ebidensyang kinawat sa iyang anak.

Si Soria sa interbyu sa mga tigbalita miangkon sa krimeng iyang nahimo ug nangayo og pasaylo sa pagsunog sa balay sa iyang agalon nga nakaamong sa iyang kaubang katabang nga si Cornelia Tagalog.

Buot unta ni Soria nga taguon ang iyang pagpangawat sa agalon ug kang Tagalog pinaagi sa pagsunog sa iyang biodata apan midako ang kalayo. (BANATNEWS)