"Shabu 11" gi-life sentence sa korte

CEBU, Philippines - Gihukmang mapriso sa tibuok nilang kinabuhi ang gibansagang “shabu-11” nga kasagaran mga langyaw’ng Intsik nga gipasanginlang nag-operate sa gi-rondang mega-shabu laboratory sa barangay Umapad syudad sa Mandaue niadtong tuig 2004.

Sa 277 ka pahinang desisyon ni Regional Trial Court-Mandaue City Branch 28 Executive Judge Marilyn Lagura-Yap iyang gihukmang mabilanggo sa tibuok kinabuhi ang mga drug manufacturer nga silang Calvin de Jesus Tan ang drug financier, Joseph Yu ang giingong supervisor, Siew Kin Weng, Liew Kam Song, Lin Li Ku, Bao Xiafu, Wu Tiao Yi, Tao Fei, Liu Bo, Allan Yap Garcia ug Joseph Lopez.

Ang grupo napamatud-ang nakalapas sa Section 26 ug 30 sa Republic Act 9165 kon The Comprehensive Dangerous Drugs Act of 2002.

Gawas sa pagkabilanggo sa tibuok nilang kinabuhi gimandoan usab sila nga mobayad og tag P10 milyones nga multa ug i-deport ang mga langyaw nga sila si Tan, Siew, Lin, Bao, Wu, Tao, ug Liu kung maserbisyuhan nila ang ilang silot.

Dose ang orihinal nga akusado apan ang usa kanila nga gihimong state-witness nga si Hung Chin Chan nga dunay mga alyas nga Simon Lao ug Andy/Anthony Ang gimandong pabuhian tungod sa kooperasyon niini.

Sa nasayran si Hung mi-apply sa korte og mosyon aron mamahimong state witness batok sa mga suspetsado nga gitugotan usab sa korte. (BANATNEWS)