"Shabu tsange" gironda

CEBU, Philippines - Nagkatibulaag og panagan ang mga gidudahang adik human gironda sa mga sakop sa Criminal Investigation and Detection Group (CIDG)-7 ang gibansagang ‘shabu tsange’ ug ang balay sa gidudahang level 1 drug pusher kagahapon sa buntag diha sa sitio Dita sa barangay Pulangbato, bukirang lugar sa dakbayan sa Sugbu.

Ang shabu tsange, nahimutang duol sa sapa sa maong lugar nga gihimoan og tuyo og mga payag-payag aron adto manuyop og shabu ang mga adik, pipila lang ka metros ang distansya sa shabu tsange sa balay sa gitumbok nga tigpamaligya niini.

Nasaksihan sa mga tigbalita nga nagpasad sa yuta ang mga tin foils nga gigamit sa mga adik sa ilang pagsuyop sa mga payag-payag duol sa sapa.

Atol sa operasyon tulo ka mga lalaki diin usa niini giingong tawo sa drug pusher ang lakip sa nasikop ug nakuhaan tagsa ka pakete nga gidudahang ang sulod shabu.

Ang nasikop mao sila si Archie Cabrillos,31, taga barangay Canduman sa dakbayan sa Mandaue; Euprocino Merafuentes, 35, usa ka drayber og habal-habal nga taga barangay Budlaan ug Doland Ople,39, taga sitio Tak-an sa barangay Budlaan sa dakbayan sa Sugbu kinsa nangangkong negosyante og anapog.

Apan ang drug pusher nga maoy target sa operasyon nga si Jeffrey Kapalaran, wala diha atol sa maong operasyon sa kapulisan apan nakakuha ang kapulisan og duha ka bultong shabu, ug laing siyam ka gamay’ng pakete nga gituohang shabu ug drug paraphernalia sulod sa kongkretong panimalay niini.

Gihimo ang maong operasyon pinasikad sa search warrant nga giisyu ni Judge Enriqueta Belarmino sa RTC Branch 57 niadtong Pebrero 15 nga kalapasan sa Section 11 Article 2 sa Republic Act 9165.

Nakakuha usab og duha ka motorsiklo ang mga pulis duol sa ‘shabu tsange’ nga wala nay miangkong tag-iya sanglit nagkatibulaag na og panagan dihang milanog ang buto sa armas human nagpasalba ang mga pulis.

Si Nestor Kapalaran, 54, amahan ni Jeffrey maoy gipasaksi sa kapulisan uban sa usa ka kagawad sa maong barangay nga si Alecia Miñoza, dihang gi-search ang balay niini sa kapulisan.

Si Miñoza nga nahinabi sa Banat News nagkanayon nga dugay na silang nakadawat og impormasyon nga ang mga drayber sa habal-habal mopaingon sa sitio Dita aron anha mamalit og drugas.

Gani ila na kining gihatagan og igong pagtagad sa barangay ug sa kapulisan sa Talamban Police Station apan mohunong lang kun dunay polis.

Matud sa amahan ni Kapalaran sa mga tigbalita nga dugay na niyang gibadlong ang anak nga mohunong sa pagpamaligya og drugas apan dili siya makapugong tungod kay naa kini pamilya nga gibuhi.

Gipangulohan ang maong operasyon ni Chief Insp. Fermin Armendares uban nila ni Insp. Delfin Buntoyan ug mga kaubanan sa CIDG-7.

Matud ni Armendares notado na kaayong mamaligyaay og shabu si Kapalaran diha sa maong lugar hinungdan nga ilaha kining gipanid-an sugod niadtong katapusan sa Enero sa miaging buwan.

Gani ilang napamatud-an ang shabu tsange duol sa sapa pipila ka metros ang distansya sa balay ni Kapalaran.

Matud ni Armendares ang mga estambay maoy mosugat ug mamaligya sa shabu ug adto sa payag-payag suyopon ang shabu.

Apan ang igsuong babaye ni Kapalaran mipasangil nga ‘planted’ ang shabu nga nakuha sa balay sa iyang igsuon. Gani ang maong balay igbaligyaay na ug wala na magpuyo diha iyang igsuon ug pamilya niini.

Apan si Armendares nagkanayon nga usa lang ka ‘gimik’ ang pamahayag sa igsuong babaye ni Kapalaran sanglit sa ilang pagpaniid ilaha pa kining gipalitan og shabu.

Si Kapalaran giingong makahalin na og 50 gramos nga shabu sa usa ka semana nga mokantidad kini og P300 mil. Ang mga nasakmit nga shabu gibana-bana ni Armendares nga mokabat kini og P57 mil.

Bisan wala diha si Kapalaran apan pasakaan gihapon siya og tukmang kaso sa kapulisan lakip na ang tulo ka dinakpan.(/EIM)  (BANATNEWS)