CEBU, Philippines - Sa Cordova, nadakpan sa checkpoint sa kapolisan sa barangay Babag, dakbayan sa Lapulapu sa miaging gabii.
Ang nadakpan mao si Melvin Paypa, 18, ulitawo nga taga sitio Caimeto sa barangay Babag, sa maong dakbayan.
Ang maong dinakpan maoy gitumbok nga mitulis kang Estephane Ando, 20, dalaga nga taga barangay Ibabao sa lungsod sa Cordova.Si PO1 Joel Pelone sa kapolisan sa Presinto 3 sa Lapulapu Police Station nga nahinabi sa Banat News miingon nga ang nakasikop sa suspetsado mao ang kapolisan nga nag-checkpoint didto sa barangay Babag sa maong dakbayan nga gipangulohan sa ilang hepe nga si Senior Inspector Jesson Paralang Jr.
Dugang pa niya nga ang suspetsado nagsakay og multicab nga pasaheroan gikan sa lungsod sa Cordova ug pag-abot niini sa ilang checkpoint girikisa ang maong suspek ug didto nasakmit sa mga otoridad ang kalibre 38 uban sa upat ka mga buhing bala nga giluklok sa hawak niini.
Matud pa ni PO3 Pelone nga human sa ilang pagkasikop kang Paypa natayming usab nga miabot sa ilang buhatan ang biktima nga si Ando kinsa positibong miila sa maong dinakpan nga maoy mitulis kaniya.
Ang biktima nga nahinabi sa Banat News miingon nga naglingkod siya sa atubangan sa barbekyohan sa barangay Ibabao dihang kalit lang mitupad kaniya sa paglingkod ang maong suspetsado nga mition kaniya og armas de fuego dungan ang pagpahibalo nga tulis.
Sumala pa sa biktima nga gikuha sa maong suspetsado ang iyang cellphone ug pitaka nga may sulod nga kuwarta ug yano kining milakaw pahilayo sa iyang nahimutangan human siya hold-apa ug misakay sa multicab nga pasaheroan paingon sa dakbayan sa Lapulapu. Gumikan sa dimalas, nasikop ang maong suspek sa mga otoridad. - BANAT NEWS