Gipusil lawas gipalapsan sa bala patay

CEBU, Philippines - Patay diha-diha ang usa ka ulitawo kinsa gipusil sa iyang barkada sa buko-buko ug milapos ang bala sa dughan didto sa barangay Langin, lungsod sa Ronda niadtong Martes sa alas 6:20 sa gabii.

Ang biktima mao si Eric Palocanog Mansueto, 23, ulitawo, way trabaho, nga molupyo sa maong lugar.

Samtang ang gitumbok nga responsabli sa krimen mao si Rolando Quirante, 30 , minyo, ug suod nga higala sa biktima.

Si Chief Insp. Bonifacio Tecson, hepe sa Ronda Police Station mibutyag sa Banat News nga ang biktima   sa sayo pa nag-estambay sa maong lugar ug naglingkod sa gi-parking niyang motorsiklo dihang giduol sa suspek ug gipusil.

Naigo sa bukobuko ang biktima ug milapos ang bala sa iyang dughan   nga maoy nakaingon sa hinanali niining kamatayon.

Si Chief Insp. Tecson kinsa maoy nanguna sa mga polis nga mirespondi sa maong hitabo ug misukit-sukit sa tanod nga si Juan Mansueto, 41 , nasayud nga duha ka buto sa armas de fuego ang nadunggan niini gikan sa dapit diin mahitabo ang pagpamusil ug dihang gisusi niini, maoy iyang nakita ang biktima   nga nagbuy-od sa yuta nga naglunang sa dugo nga wala nay kinabuhi tupad sa iyang motorsiklo.

Nailhan sa kapolisan ang suspek dihang mitug-an ang mga nakasaksi sa maong hitabo kinsa miingon nga ang biktima ug ang suspek suod kaayo nga mura og managsuon busa nahibulong sila sa maong hitabo.

Ang kapolisan nakig-alayon na sa asawa ug ginikanan sa suspek aron awhagon kini sa pagtahan sa kaugalingon ngadto sa mga otoridad. Ang suspek gituohang nagtago-tago karon sa bukirang bahin sa maong lungsod ug padayong gipangita sa kapolisan.  - BANAT NEWS