CEBU, Philippines - Patay ang usa ka 25-anyos nga lalaki human kini moambak sa gisakyang barko didto sa kadagatan sa Gigante Island, habig sa Iloilo City niadtong Martes sa hapon.
Si Cebu Coast Guard Commander Rolando Punzalan Jr., nga nahinabi sa mga tigbalita miila sa biktima nga mao si Marvin Andales,25, taga sitio Paula Maria sa barangay Inayawan ning dakbayan sa Sugbo.
Si Andales uban sa iyang apohang babaye nga si Candida Andales, 93, sakay sa M/S St. Joseph The Worker sa Negros Navigation gikan sa Manila ug paingon dinhi sa dakbayan sa Sugbo.
Matud ni Punzalan nga sa pasiunang report nga midangat sa iyang buhatan nga sa ala 1:25 sa hapon niadtong Martes maoy pag-ambak ni Andales sa barko dihang naabot na sa habig sa Gigante Island sa Iloilo City. Ang kapitan sa barko nga si Capt. Henry Ledesma daling mipahigayon og search and rescue operation uban sa mga sakop sa Coast Guard district sa Western Visayas ug ilang naluwas ang biktima nianang alas 2:07 sa hapon.
Apan si Dr. Jennefer Picalda sa maong barko mideklarar sa biktima nga namatay nianang pagka alas 2:17 sa hapon.
Ang apohang babaye mitug-an sa mga crew sa barko ug kang Dr. Picalda nga dunay nervous breakdown ang iyang apo ug maoy usa sa gituohang rason nga milayat kini sa barko.
Matud ni Punzalan nga migikan ang barko niadtong Lunes didto sa Manila alas 7:44 sa buntag ug gikatakda unta kining moabot alas 10:30 niadtong Martes sa gabii sa pantalan sa dakbayan sa Sugbo.
Si Punzalan miingon nga iyang gimandoan ang tagdumala sa barko sa pagduso og incident report ug ingon man ang marine protest aron masuta ang hinungdan sa panghitabo.
Base sa manifesto sa barko, si Andales ug ang apohan niini didto mokuha og teheras sa Economy Class Deck C. Matud ni Punzalan nga nagpadayon usab ang ilang imbestigasyon sa maong hitabo.
Si Helen Andales, 48, inahan sa biktima nga nahinabi sa Banat News nagkanayon nga niadtong Martes sa buntag nagka text-text pa sila sa iyang anak. Apan miingon kaniya ang iyang anak nga kanunay kining kulbaan.
Matud ni Helen nga iya untang patawagon sa iyang cell phone ang iyang anak apan nahutdan na kini og load. Nianang ala 1:00 sa hapon nakadawat na usab siya og text gikan gihapon sa iyang anak ug mihangyo nga magpasugat sila sa iyang lola inig dunggo sa pantalan.
Matud ni Helen human sa ilang pagteksanay, wala na siya makadawat pa og laing text gikan sa iyang anak, gawas lang niadtong tawag nga iyang nadawat gikan sa Manila nga nagpahibawo nga miambak sa barko ang biktima ug patay na.
Ang mga crew sa maong barko didto manawag sa iyaan sa biktima nga si Neri Hugo nga nagpuyo sa Cavite City ug maoy gipuy-an sa biktima sulod sa duha ka buwan. Apan nagkanayon si Helen nga sumala sa iyang nasayran gikan sa iyaan, nga upat na ka adlaw nga walay tulog ang iyang anak ug nagtuo siyang may nerbyus na kini.
Mihangyo ang ginikanan ug igsuon sa biktima ngadto sa tagdumala sa barko nga unta hatagan sila og hinabang sanglit aduna silay bayronon sa punerarya. - BANAT NEWS