Mikatkat sa poste kay maghikog

CEBU, Philippines - Human sa usa ka oras nga negosasyon sa kapolisan ug mga sakop sa Bureau of Fire Protection, naluwas ang usa ka lalaki nga mikatkat sa poste kay buot untang maghikog didto sa Hi-way Seno sa dakbayan sa Mandaue, kagahapon sa alas 10:00 sa buntag.

Si Ronil Agsoy, 30, ulitawo apan dunay kapuyo nga taga sitio Tubigon sa barangay Santican sa dakbayan sa Danao, naluwas ni Insp. Diosdado Malazarte sakop sa Special Weapons and Tactics (Swat) Team sa Mandaue City Police Office (MCPO).

Si Agsoy nga nahinabi sa Banat News mitug-an nga gikan pa siya sa Vicente Sotto Memorial Medical Center (VSMMC) kay nalandig ang iyang 3-anyos nga batang lalaki human mabali ang paa dihang natumbahan sa biseklita niadtong Domingo sa hapon didto sa balay sa iyang ugangan sa Ilaya sa dakbayan sa Danao.

Apan sa wala pa siya mobiya sa VSMMC nagkaaway sila ug sa iyang kapuyong si Vivian Malbago nianang kaadlawon pa. Matud ni Agsoy nga bahin sa ilang pagpuyo ang ilang giawayan sanglit wala man silay problema sa bayranan sa iyang anak nga nalandig sa nahisgutang tambalanan.

Paingon na unta siyang mouli sa dakbayan sa Danao apan kalit lang nausab ang iyang huna-huna ug buot siyang magpakamatay hinungdan nga mikatkat siya sa poste sa kuryente sa hi-way Seno.

Dihang nakit-an si Agsoy sa mga tawo sa tumoy sa poste dali kining gialarma sa kapolisan sa Mandaue lakip ang mga sakop sa BFP.

Si PO1 Ariel Gingco sa Police Station 1 sa MCPO nga nahinabi sa Banat News nagkanayon nga alas-10:00 sa buntag gialarma si Agsoy ug milanat og usa ka oras una pa kini naluwas sa grupo ni Insp. Malazarte.

.Gibana-banang adunay gitas-ong kinse ka tiil ang poste nga gikatkatan ni Agsoy,.

Temporaryo unang gitanggong sa kapolisan si Agsoy samtang giandam ang kasong Alarm and Scandal batok kaniya  - BANAT NEWS