Cebu gipasidunggan sa DOT ug DOLE

CEBU, Philippines - Ang Department of Tourism (DOT) miila sa lalawigan sa Sugbo nga maoy labing maayong probinsya nga mipatuman sa programa sa turismo sa tibuok nasud nga Pilipinas tungod sa epektibong pagpatuman sa mga programa nga nakadani og daghang mga turista dinhi sa nasud.

Kini gumikan sa hugot nga pagpatuman sa Suroy-Suroy Sugbo program ni Governor Gwendolyn Garcia nga nakatampo sa dakong kalamboan sa turismo ug sa ekonomiya sa Sugbo ug sa nasud pinaagi sa pagpatuman sa maayo nga sistema sa pagsubay sa mga programa sa DOT.

Si DOT Secretary Ramon Jimenez Jr. ug si Takahiro Sasaki sa Japan International Cooperation Agency (JICA) miila sa Sugbo   nga Top Local Government Unit sa pagpalambo sa tourist statistics system sa tibook nasud.

Kini ang gipalanog ni Engr. Adolfo Quiroga, Chief Provincial Planning and Development Office ug OIC sa Cebu Provincial Engineering Office atol sa gipahigayong miting sa mga department head ug mga Capitol consultant nga iyang gipangunahan. 

 Matud ni Quiroga nga gumikan sa sistema nga gipasiugdahan sa gobernador sa pagmonitor ug pag-aghat sa mga lokal ug langyaw nga mga turista sa pagbisita nganhi sa Sugbo maoy hinungdan nga gitunol ni Jimenez ug Sasaki ang pasidungog alang sa lalawigan didto sa Diamond Hotel sa kaulohan dili pa dugay.

Sigun pa ni Quiroga nga gidayeg sa maong mga opisyal ang dili matupngan nga Suroy-suroy Sugbo program ning lalawigan.

Samtang sa pikas bahin gumikan usab sa seryosong pagtutok ni Gobernador Garcia sa paghatag og trabaho ngadto sa mga Sugboanon ug sa ubang mga silingang lalawigan sa Sugbo ma-lokal o malangyaw man nga trabaho, si Secretary Rosalinda Dimapili Baldoz sa Department of Labor and Employment (DOLE) miila usab karon sa lalawigan sa Sugbo nga usa sa Outstanding Performing Local Government Unit sa nasud sa pagsuporta ug pagpatuman sa mission- vision sa DOLE nga makahatag og tabang sa panarbaho sa mga Filipino. 

Gawas niini nakadawat usab og award si Dr. Mathea Baguia, Consultant on Labor Market Information gikan sa maong departamento ug nominado kini sa national level sa samang kaugmaran.

Nasayran nga gawas niining maong award ikalima na kining higayon nga ang Sugbo nakadawat og citation award isip top performer sa departamento sa pamuo. (/WC)(BANAT NEWS)