OSG mitubag sa kaso sa mga Rallos

CEBU, Philippines - Mihangyo ang Vicente Sotto Memorial Medical Center sa korte nga ibasura na ang kasong sibil nga gisang-at batok kanila sa nangangkon sa pipila ka parte sa yutang gibarogan sa maong tambalanan.

Ang VSMMC pinaagi sa Office of the Solicitor General (OSG) miduso sa ilang tubag sa kasong sibil nga gisang-at sa petisyoner nga si Carlos Anton Rallos Jr. nga nangangkong ang ilang pamilya maoy nanag-iya sa yuta nga 484-A nga adunay 17, 254 square meters nga nahimutang sa dalan B. Rodriguez barangay Sambag 2 ning dakbayan.

Base sa tubag sa Assistant Solicitor General Herman Cimafranca nga ilang gisumitir sa korte, kulang sa merito ang kaso ni Rallos ug angayang ibasura dungan sa pag-insister nga dunay titulo ang gobiyerno sa maong yuta.

Una nang nangangkon ang mga Rallos nga duna silay titulo sa maong luna apan masaligon ang OSG nga dili matupngan sa mga Rallos ang dokumentong ilang gikuptan.

Sa laing bahin, si Jack Rallos usa sa mga sumusunod mibutyag sa Banat News nga iyang kwestyunon sa sunod hearing karong Pebrero 28 kun nganong adunay titulo ang gobiyerno sa luna nga gipanag-iya sa ilang pamilya nga wala man unta kini gibaligya.

Matud pa niini bisan og adunay mga estorya nga ang yutang gibarogan sa VSMMC gidonar kini sa namatay’ng si Victoria Rallos apan wala silay nakitang dokumento nga kini nagpamatuod nga gidonar. (BANAT NEWS)