Resort gibutangag 'Bomba'

CEBU, Philippines - Suway nga pagpaulbo sa usa ka beach resort sa barangay Bangkasan sa lungsod sa San Remegio napakgang human madiskubrehi sa nag-imbestigar nga kapolisan ang usa ka improvised ‘timed bomb’ sa usa sa mga cottages niini atol sa ilang pagsusi sa unang pagbuto nianang sayo pa sa kaadlawon niadtong Domingo.

Ang kapolisan sa lungsod sa San Remegio pinangulohan sa ilang hepe nga si Sr. Insp. Rovic Villarin ug mga sakop miadto sa Casa Delmar Resort sa Brgy. Bangkasan sayo sa buntag niadtong Domingo tungod sa lanog nga pagbuto sa sulod sa compound sa maong resort nianang alas-3 sa kaadlawon.

Ang maong resort gipanag-iya sa usa ka Swedish national nga si Lars Lofgren nga naminyo og Filipina nga si Liza Lofgren kinsa wala diha sa resort atol sa hitabo. Swerteng walay bisan usa nga na-report nga naigo sa maong pag-ulbo.

Matud pa nga pasado alas-9 na sa buntag nianang Domingo na pahibaw-a ang kapolisan kabahin sa maong pag-ulbo apan bisan paman gisusi dayon sa kapolisan ang palibot.

Atol sa pagsiksik pagpangita og clue o ebidensya sa pag-ulbo sa gituohang dinamita, laing dinamita nga gibutangan og improvised timer nga gidagkotang katol nga gisumpay sa ‘blasting cap’ niini ang ilang nadiskubrehan.

Sumala pa ni SPO1 Joejohnnesky Ynot nakita sa iyang mga kaubanan ang dinamita nga gisuksok sa bungbong sa usa sa mga cottages nga nagbaga na ang katol. Gituohang kung wala kini madiskubrehi hayan moulbo usab ang dinamita.

Matud ni Sr. Insp. Villarin dihang nahinabi sa Banat News nahitabo ang pag-ulbo nianang kaadlawon sa Domingo. Sumala pa ni Villarin tulo ka anggulo ang ilang gisubay sa maong hitabo nga naglakip sa away sa management ug sa tag-iya sa luna nga napalit sa maong langyaw.

Susihon usab ang giingong panagbangi sa management ug sa Korean national nga miabang kaniadto sa golf course sa maong resort ug ang posibilidad nga may mga kawaning nasuko sa management.

Sa pagkakaron si Villarin wala pay mahatag nga kongkretong anggulo nga ilang gisubay aron magtumbok sa motibo sa suway nga pagpamomba o ba kaha pagpanghadlok ra kini.

Nasayran nga dugay nang gimanduan sa hepe sa kapulisan ang management sa maong resort nga magbaton og gwardiya tungod kay sudlonon ang maong lugar aron mamentinar ang kahusay ug kalinaw ingon man seguridad sa mga guests niini. (EIM)(BANAT NEWS)