Mga biktima miapelar nga di pabuhian ang NPA leader

BACOLOD CITY, Philippines  — Giawhag sa mga pamilya sa mga biktima sa giingong lider sa New People’s Army (NPA) ang mga awtoridad nga dili kini pabuhian gikan sa bilanggoan tungod sa kabalaka nilang posibleng mobalik kini sa kabukiran.

Sumala pa sa tigpamaba sa 3rd Infantry Division sa Philippine Army nga si Capt. Reylan Java ang mga kabanay sa biktima gibati og kabalaka sa pagtugot sa lokal nga korte nga makapiyansa ang NPA leader nga si Romeo Nanta og P200,000 sa pipila ka mga kasong giatubang niini.

Ang mga kabanay sa mga biktima ni Nanta nahadlok sa ilang seguridad tungod sa maong balita matud pang Java.

Si Nanta, 54, naaresto sa usa ka joint police ug militar niadtong Nobiyembre 7, 2011 sa Brgy. Zone 2 sa Cadiz City pinasikad sa warrant of arrest sa kasong rebelyon, robbery-in-band, attempted ug frustrated murder gikan sa tulo ka mga korte sa Negros Occidental.

Ang militar miingon nga si Nanta, adunay mga alyas nga Juanito Magbanua, Jack Nanta, Juaniang, Islao ug Kulas, ilang gihulagway nga lider sa NPA Regional Operations Command.

Si Judge Moises Nifras sa San Carlos City Regional Trial Court wala motugot kang Nanta nga makapiyansa sa kasong robbery-in-band. Apan si Judge Jose Aguirre sa Himamaylan City Regional Trial Court ug Judge Victor Magahud sa Ilog-Candoni Municipal Circuit Trial Court mirekomendar og P200,000 nga piyansa sa mga kasong rebelyon, frustrated murder ug attempted murder ni Nanta.

Si Major General Jose Mabanta, ang 3ID Commander,miingon nga mas malinawon na karon ang isla sa Negros sukad nga naaresto si Nanta. “The decision to grant his (Nanta) request for bail lies with the court and we will always uphold the rule of law,” pasabot pa niini.

Apan si Java mibutyag nga base sa ilang rekord ang tanang mga sakop sa NPA nga gimandong pabuhian sa korte gikan sa bilanggoan kasagarang namalik sa ilang grupo, kini sama sa kaso ni Marilyn Badayos alyas Eunice/Jonna, nga usa sa mga NPA commanders sa Southern Negros.  (BANATNEWS)