2 patay,8 angol sa pinusilay sa pista

Bacolod City, Philippines —Nahimong dugoon ang gipahigayong pista sa Brgy. Kapitan Ramon sa Silay City, Negros Occidental niadtong Sabado sa gabii human duha ka mga lalaking namayle ang napatay ug walo ang naangol dihang usa ka kanhi sakop sa Revolutionary Proletarian Army (RPA) nakigpinusilay sa usa sa mga biktima.

Sumala pa sa report ang nakalas mao si Richard Centina, 40, nga taga Hacienda Cumabat sa Brgy. E. Lopez, Silay City ug Sonny Boy Tongcua, 41, nga taga sitio Mambucog sa Talisay City.

Si Centina napusilan sa dughan, bukton ug tiil ug namatay sulod sa Pablo O. Torre Memorial Hospital sa Bacolod City samtang si Tongcua nakaangkon og usa ka samad pinusilan sa likod patay na pag-abot sa mao gihapong tambalanan.

Ang nangaangol matud pa sa kapolisan mao sila si Mark Derbin Bacera, Mark Guardiano ug Johnny Lima, nga pulos 16-anyos nga taga Brgy. E. Lopez, ug mga silingang sila si Glegorio Guardiano, 43; Marcelo Gonzales, 44; Herman Dela Cruz, 42; Joel Mainge, 49, nga taga Brgy. Kapitan Ramon; ug Dalton Mayo, 18, taga Brgy. Guimbalaon, Silay.

Sumala pa ni Silay City police chief Supt. Rosauro Francisco adunay gipahigayong pista sa maong barangay nianang tungora ug ang mga biktima mitambong sa maong kalingawan.

Nasuta sa imbestigasyon sa kapolisan nga si Centina ug ang suspek nga si Ryan Layo, taga Hacienda San Rafael sa Brgy. Guimbalaon, Silay City nagkalalis sa wala pa ang pinusilay.

Sumala pa nga adunay mga testigos nga mitug-ang adunay tulo ka kauban si Layo nga nagtaptap sa ilang mga nawong dihang misulod sa diskohan sa Hacienda Lapus ug kalit mipusil kang Centina.

Si Centina kinsa giingong armado usab nakahigayon sa pagbawos hinungdan sa nahitabong pinusilay.(/EIM) (BANATNEWS)