World Youth Day gitakda sa Marso

CEBU, Philippines - Ang presidente sa Sangguniang Kabataan Federation-Cebu City Chapter John Philip Po midasig sa mga kabatan-onan nga mosalmot sa tinuig nga Local World Youth Day (LWD) nga himoon dinhi sa Siyudad sa Sugbo sa katapusang bahin sa buwan sa Marso.

Sumala pa ni Po nga importante kaayo ang partisipasyon sa mga kabatan-onan sa mga relihiyosong kalihukan.

Matud pa niya nga aduna na usab siyay giimbitar nga mga SK official nga mosalmot sa nahisgutang kalihukan.

Ang maong Katolikanhong kalihokan bitoonan sa pag-ampo, katekismo ug uban pang buhatunon sa simbahan.

Ang labing una nga Local World Youth Day nagsugod niadtong 1989 pinaagi ni kanhi Arsobispo sa Sugbo Ricardo J. Cardinal Vidal .

Gihimo kini sa Archbishop Palace ug gumikan sa kalamposan niini gihimo na kini matag tuig.

Ibalhin-balhin matag tuig ang venue sa LWYD nga gani sa miaging tuig didto kini ipahigayon sa Lungsod sa Argao.

Ang maong kalihokan karong tuiga nagtangag sa tema nga “Standing firm in faith doing all your work in love” ug gibana-bana nga salmotan kini sa liboan ka mga kabatan-onan nga maggikan sa nagkalainlaing parokya sa Kabisay-an.

Ang LWYD gipasiugdahan sa Archdiocese sa Sugbo ug kini gidumala karong tuiga sa District Youth Coordinating Council-1 .

Suma pa sa presidente sa district 1 nga si Ian Rey Pableo nga hugot nga seguridad ang ipatuman sa kapolisan atol sa maong kalihokan gumikan sa kadaghang bisita nga mangabot dinhi sa Sugbo.

Nagpadayon ang rehistrasyon sa LWYD sa buhatan sa Mt. Carmel Parish sa University of San Jose Recoletos.  (BANATNEWS)